Эрүүл Мэндийн Яам, Хавдар Судлалын Үндэсний Төв, Швейцарын F.Hoffmann-La Roche компани хамтран хавдрын системийн эмчилгээний сүүлийн үеийн шинэ технологийн нэг болох дархлаа эмчилгээг Монголд нэвтрүүлэх ажлыг эхлүүлэхээр өнөөдөр харилцан ойлголцлын санамж бичигт гарын үсэг зурлаа.
Монгол Улс хорт хавдрын ялангуяа элэгний хорт хавдрын өвчлөл, нас баралтаар Азид төдийгүй дэлхийд тэргүүлдэг.
Эрүүл мэндийн сайд С.Чинзориг хэлэхдээ "Хавдрын өвчлөл нас баралтыг буруулахад дэлхийн шилдэг компаниудын өндөр технологийн эм, эмчилгээг нэвтрүүлэх нь хамгийн үр дүнтэй, олон улсад хүлээн зөвшөөрөгдсөн, сайн туршлага байдаг.
Санамж бичгийг байгуулснаар хорт хавдрын эмчилгээ, судалгаагаар дэлхийд тэргүүлэгч Швейцарын Рош компани Монгол Улсад элэгний хорт хавдрын эмчилгээнд дархлаа эмчилгээний хамгийн сүүлийн үеийн технологийг нэвтрүүлэхийн зэрэгцээ хамгийн элбэг тохиолддог 15 эрхтний үсэрхийлсэн хорт хавдрын үед хэрэглэдэг бай болон дархлаа эмүүдийг хамгийн бага үнээр буюу "Бүх эмийг нэг өвчтөнд нэг үнээр" нийлүүлэх РАСЕ тусгай хөтөлбөрийг хэрэгжүүлэх боломж бүрдлээ.
Монгол Улсад элэгний хожуу шатанд оношлогдсон хавдар болон уушги, хөх, ходоод, өндгөвч, умайн хүзүү, бүдүүн шулуун гэдэсний хорт хавдрын эмчилгээний хөгжил, чанар, хүртээмжид том алхам хийгдэнэ. Учир нь эдгээр эм их өндөр өртөгтэй бөгөөд элэгний хавдартай өвчтөн зөвхөн нэг удаагийн тариаг тунгаасаа хамаарч 8,000-9,392 ам.доллароор (20-32 сая төгрөг) хийлгэдэг бол манай улсад маш бага үнээр буюу 1,000 орчим ам.доллароор нийлүүлэх санал тавьж байгаа" гэлээ.
"ЭХНИЙ ДӨЧИН ХҮНД ХСҮТ-ИЙН САНХҮҮЖИЛТЭЭР ХИЙЖ, ДАРААГААР НЬ ИРГЭД ДААТГАЛААР ДАРХЛАА ЭМЧИЛГЭЭГЭЭ ХИЙЛГЭХ БОЛОМЖ НЭЭГДЭНЭ"
Тэрбээр үргэлжлүүлэн "Иргэдэд санхүүгийн дарамтгүйгээс гадна Эрүүл мэндийн даатгалын санд санхүүгийн дарамт үүсгэхгүй гэрээ хийгдэж байгаа. Ийнхүү Монголдоо дархлаа эмчилгээг иргэдэд дарамтгүйгээр оруулж ирэх боломж бүрдлээ. Учир нь эмүүд нь өндөр үнэтэй тул шууд худалдан авах боломж байгаагүй тул тодорхой хугацаанд хэлцэл хийж, "Roche" компанийн бүтээгдэхүүнийг эмнэлгийн тусламж үйлчилгээнд нэвтрүүлэх болсон.
Тус газрын РАСЕ тусгай хөтөлбөрт орсноор 20-32 сая төгрөгийн үнэтэй дархлаа эмчилгээг нэг хүнд хүргэхдээ найман сая төгрөгөөр хүргэх боломжтой гэж үзсэн. Манай улсад бай эмчилгээ таван сая төгрөгөөр хийгддэг ба энэ нь дангаараа хүнд хүрдэггүй. Харин одоо бай эмчилгээг дархлаа эмчилгээтэй хавсарч хийх эмчилгээ нь найман сая төгрөг болж байна гэсэн үг.
Төсөл гурван жил үргэлжлэх хэдий ч бид энэ хугацаанд цаг хожно. Эхний дөчин хүнд ХСҮТ-ийн санхүүжилтээр хийнэ. Иргэддээ аюулгүй хүргэж байна гэдэг үр дүнгээ батлуулсны дараа илүү өргөн хүрээнд хүргэх боломж нээгдэнэ. Тэр үед иргэд даатгалаар дархлаа эмчилгээгээ хийлгэх боломж Эрүүл мэндийн санд шинээр орж ирж буй "Дархлаа эмчилгээний багц"-ын хүрээнд бий болно" гэлээ.
"Roche" компанийн Турк, ОХУ, Иран, Тев Ази, Кавказ, зуун Европ болон Энэтхэгийг хариуцсан бүсийн дарга Адриано Треве "Монголд ойролцоогоор 7,000 гаруй хүн хавдраар оношлогдож байгаагийн 2,500 орчим нь элэгний хавдраар оношлогдож байгаа. Хожуу хорт хавдраар оношлогдож байгаа өвчтөнүүд тэр болгон эмчилгээ авч чадахгүй байгаа учраас дархлаа эмчилгээг нэвтрүүлэх шаардлагатай гэж бид үзэж байгаа. Иймд энэхүү эмчилгээг нэвтрүүлэхээр хамтран ажиллаж буй явдалд талархаж байна.
Бай эмчилгээ болон дархлаа эмчилгээ нь системийн бусад эмчилгээтэй харьцуулахад гаж нөлөө багатай төдийгүй хувь хун тус бурт өвөрмөц байдгаараа онцлогтой.
Нэмж мэдээлэхэд Монгол Улсад 2021 оноос бай эмчилгээний зарим эмүүдийг эрүүл мэндийн даатгалд 100% хамруулснаар ходоод, хөх, өндгөвч, бүдүүн шулуун гэдэс, мэнгэний хорт хавдрын эмчилгээнд бай эмчилгээ нэвтэрсэн. Хэдийгээр бай эмчилгээ Эрүүл мэндийн даатгалд бүрэн хамрагдсан боловч дархлаа эмчилгээ даатгалд хараахан хамрагдаагүй тул энэ хоёр эмчилгээг өвчтөнүүдэд хавсран хийх боломжгүй байгаа юм.
Сэтгэгдэл бичих