Хятад улс Тайванийн зүгт сүүлийн 24 цагийн хугацаанд 103 байлдааны онгоц илгээсэн тухай Тайванийн Батлан хамгаалах яам мэдэгдээд “өрөөсгөл бөгөөд аюултай үйл ажиллагаагаа” зогсоохыг Хятадад хандан уриалжээ.
Хятадын байлдааны онгоцууд ням гаргийн өглөөний 06:00 цагаас даваа гаргийн өглөөний 06:00 цагийн хооронд Тайванийг чиглэн нисэж, аралд хүрэхээсээ өмнө буцсан байна. Тэдгээр онгоцуудын 40 нь эх газрын Хятад ба арлын хоорондох зааглах шугамыг давжээ.
Хятад улс Тайванийг нутаг дэвсгэрийнхээ нэг хэсэг гэж үздэг бөгөөд тус арлын эргэн тойронд байнга цэргийн сургуулилалт хийдэг. Мөн тус газар нутгийг хяналтдаа авахын тулд хүч хэрэглэхийг үгүйсгэдэггүй.
Өнгөрсөн долоо хоногт Хятад улс Тайванийн усан хил рүү нисэх онгоц тээгч “Shandong” хөлөг онгоц болон байлдааны бусад хөлөг онгоцуудаа илгээжээ. Уг сургуулилалтыг АНУ, Канадын байлдааны хөлөг онгоцнууд Тайванийн хоолойгоор дайран өнгөрсний дараахан хийсэн байна. АНУ бол Тайванийн хувьд хамгийн том зэвсэг нийлүүлэгч бөгөөд Тайванийн статусыг хүчээр өөрчлөх оролдлогыг эсэргүүцдэг.
Тайванийн Батлан хамгаалах яам Хятадын эл үйлдлийг “айлган сүрдүүлэх алхам” гэж тодорхойлоод, энэ нь өнөөгийн хурцадмал нөхцөл байдлыг даамжруулж болзошгүйг анхааруулжээ. “Бид Бээжингийн эрх баригчдад хандан, хариуцлагатай байж, ийм төрлийн цэргийн ажиллагаагаа нэн даруй зогсоохыг уриалж байна” гэж тус яамны мэдэгдэлд дурджээ. Харин Хятадын Батлан хамгаалах яам ямар нэгэн хариу өгөөгүй байна.
Сэтгэгдэл бичих