Ус, цаг уурын хүрээлэнгээс уур амьсгалын өөрчлөлт Монголд хэрхэн нөлөөлж байгаа бодит ажиглалтын мэдээ, супер компьютерын гаргаж ирсэн тооцооллыг танилцууллаа. 

Уур амьсгалын өөрчлөлтөөс үүдэж манай оронд үер, хүчтэй салхи шуурга, ган зуд нэмэгдэх хандлагатай байгаа аж. 

Хур тунадасны хуваарилалтын сүүлийн 40 жилийн мэдээгээр цаашид аадар бороо орох нь ихсэж шиврээ бороо орох магадлал буурах төлөв гарчээ. Энэ нь богино хугацаанд их хэмжээний бороо орж үерийн эрсдэлийг нэмэгдүүлж байна гэдгийг Ус цаг уур, орчны судалгаа, мэдээллийн хүрээлэнгийн захирал Г.Сарантуяа онцолж байв. 

"Үер, аадар бороо, аянга цахилгаанаас үүдэж  жилд дунджаар 50-70 тэрбум төгрөгийн хохирол учирч байна"

Манай оронд зонхилон тохиолддог аюулт үзэгдлийг эзлэх хувиар нь авч үзэхэд үер, аадар бороо, аянга цахилгаан 47% хувийг эзэлж байна. Түүнчлэн сүүлийн 20 жилд эдгээр аюулт үзэгдлийн давтагдал хоёр дахин нэмэгдсэн ба жилд дунджаар 50-70 тэрбум төгрөгийн хохирол учруулж байна гэсэн тооцоо гарчээ. 

Жишээлбэл Сүхбаатар дүүргийн 12 дугаар хороо гэхэд 2030-2080 онд тэр чигтээ живэх эрсдэлтэй байгаа аж. 

Улаанбаатар хотод нийтдээ дөрөвхөн автомат станц ажилладаг байна. Түүнчлэн улсад ганцхан ширхэг Японы тусламжаар орж ирсэн радар байдаг аж. Иймд цаашид радар болон, автомат станцуудыг тоог нэмэгдүүлэх зайлшгүй шаардлагатай байна гэдгийг Ус цаг уур, орчны судалгаа, мэдээллийн хүрээлэнгийн захирал Г.Сарантуяа онцолж байлаа.