Цалин, тэтгэвэр тэтгэмж нэмэх, хүүхдийн мөнгийг хүсэлт гаргасан хүүхэд бүрд олгохын тулд 2023 оны улсын төсөвт тодотгол хийх асуудлыг УИХ-ын чуулганы хуралдаанд хэлэлцэж байна.
Энэ үеэр УИХ-ын гишүүн Ж.Чинбүрэн төсвийн тодотголтой холбогдуулан сайд нараас асуулт асууж, хариулт авав.
- Эрүүл мэндийн салбарын санхүүжилт 122 тэрбум төгрөгөөр нэмэгдэж байна. Хүн ам цөөн, алслагдсан сумдын эрүүл мэндийн санхүүжилтийг тодотголд оруулсан уу?
Эрүүл мэндийн сайд С.Чинзориг: Төсвийн тодотголтой холбогдуулан эрүүл мэндийн байгууллагуудад олгох гүйцэтгэлийн санхүүжилтийн тарифт өөрчлөлт орно. Ялангуяа, сумын эрүүл мэндийн байгууллагын анхан шатны үйл ажиллагааг дэмжихтэй холбоотой хүн ам цөөн, алслагдсан газрын тарифыг өөрчилж, долдугаар сарын 1-нээс эхлэн хэрэгжүүлнэ.
Төсвийн тухай хуульд өөрчлөлт оруулах асуудлыг Сангийн сайдтай ярилцаад, ирэх долоо хоногийн Засгийн газрын хуралдаанаар хэлэлцэхээр төлөвлөсөн. Одоогийн хуулиар сум болон тосгоны эрүүл мэндийн байгууллагуудад жилийн эцэст санхүүжилт үлдсэн ч түүнийг захиран зарцуулах эрхгүй байдаг. Өөрөөр хэлбэл тухайн санхүүжилтийг буцаан татдаг. Иймд сум болон тосгоны эрүүл мэндийн байгууллагуудад жилийн эцэст санхүүжилт үлдсэн бол түүгээрээ нийгмийн хамгаалал, цалин хөлс, шаардлагатай багаж, хэрэгслээ худалдан авдаг байх эрхийг нээж өгнө.
- Дүүрэг, аймгийн эрүүл мэндийн газруудын ажилчдын цалин хөлс нэмэгддэггүй. Энэ удаагийн төсвийн тодотголоор тэдний цалин нэмэгдэнэ гэсэн. Бодитоор хэрхэн нэмэгдэх вэ?
Эрүүл мэндийн сайд С.Чинзориг: Эрүүл мэндийн салбарын ажилтнуудын цалин дунджаар 43 хувь нэмэгдэж байгаа. Үүний дагуу Эрүүл мэндийн даатгалын үндэсний зөвлөлийн холбогдох шийдвэрүүдэд өөрчлөлт оруулна.
Харин аймаг нийслэлийн эрүүл мэндийн байгууллагын ажилчид нь төрийн захиргаа гэсэн албан тушаалтай юм билээ. Одоогийн төсвийн тодотголоор цалингийн асуудлын эх үүсвэр нь шийдэгдэх учир 40-өөс доошгүй хувиар нэмэх боломжтой.
- Шатахуун, түлш хязгаарлагдах гээд байна гэдэг мэдээлэл гарчээ. Эрүүл мэндийн салбарын алсын дуудлага, түргэн тусламж нь шатахуун, түлштэй холбоотой байдаг. Иймд төсвийн тодотголд шатахуун, түлшний асуудлыг тусгах уу?
Уул Уурхай, Хүнд Үйлдвэрийн сайд Ж.Ганбаатар: АИ-92 болон дизель түлшний хангамж, нийлүүлэлт хэвийн байгаа. Дизель түлшний үнэ 200-300 төгрөгөөр буурсан. Наймдугаар сард ОХУ-ын Ангарский үйлдвэрт жил бүр 7-14 хоногийн засвар хийгддэг. Мөн зуны түлшнээс өвлийн түлш рүү шилжих явцад хомсдол үүсдэг. Тиймээс манай яамны зүгээс хомсдолоос сэргийлэх бэлтгэл ажлыг хангаж байгаа. Энэ хүрээнд олон газар, агентлагийн дарга, сайд руу албан бичиг явуулж байна.
Сэтгэгдэл бичих