ХХБ нээлттэй хувьцаат компани болж байгаатай холбогдуулан БНСУ-ын БиСи Карт түүний хамаарал бүхий компанийн удирдлагууд Монгол Улсад хүрэлцэн ирж банкны удирдлагуудад баяр хүргэлээ.
Уулзалтын үеэр ХХБ-ны Гүйцэтгэх захирал О.Орхон “Бидний дараагийн зогсоол бол олон улсын хөрөнгийн бирж” гэдгийг онцлон хэлсэн юм. Мөн БиСи Карт компанийн зүгээс хэрэгжүүлэх төлбөрийн системийн шинэчлэлд Монгол Улс дахь голлох хамтрагчаар ХХБ ажиллахаар тохиролцов. Ийнхүү хамтын ажиллагааны гэрээг үзэглэж төлбөрийн системийн шинэчлэлийн ажлыг яаралтай эхлүүлэхээр боллоо.
БиСи Карт компани нь 42 сая хэрэглэгчтэй, 3 сая мерчантыг өөртөө элсүүлсэн БНСУ-ыг төлөөлөх хамгийн том картын компаниудын нэг юм. Түүнчлэн харьяа банкнуудын сүлжээг ашиглан 83,000 ширхэг АТМ тус компанийн картыг хүлээн авдаг байна.
Худалдаа, хөгжлийн банк нь олон улсын жишигт нийцсэн бүтээгдэхүүн үйлчилгээг нэвтрүүлж, харилцагчдаа дэмжин ажилласаар ирсэн. Цаашид БиСи Карт компанитай хамтран илүү өргөн боломжийг харилцагчдадаа хүргэхээр ажиллаж байна.
Сэтгэгдэл бичих