Боловсролын зээлийн сангаас гадаадын шилдэг их, дээд сургуульд бакалавр, магистр, доктороор суралцагчдад боловсролын зээл олгодог билээ. Тэгвэл 2020-2022 онд суралцсан суралцагчдын мэдээллийг Нийтийн мэдээллийн ил тод байдлын тухай хуулийн хүрээнд ил болгов. Үүнээс шүүж үзвэл, улс төрд хамаарал бүхий болон олны танил дараах эрхмүүд БЗС-ийн зээлээр суралцжээ. Тодруулбал, УИХ-ын дөрвөн гишүүн, төрийн байгууллагад дарга хийдэг 10 хүн байгаа юм.
Тэд зээлээ хэрхэн авсан, эргэн төлөлт хэр байгаа талаараа эхнээсээ тайлбар хийж эхэлсэн. Тухайлбал, УИХ-ын гишүүн Г.Дамдинням зээлийг шалгуурын дагуу авсан, БЗС-д зээлээ төлж өргүй болсон гэсэн байна. Нээлттэй болгосон мэдээллээс харахад УИХ-ын дарга Г.Занданшатарын хоёр хүүхэд зээлээ бүрэн төлж дууссан гэжээ. Мөн ҮАБЗ-ийн нарийн бичгийн дарга Ж.Энхбаяр зээлээ төлсөн гэж мэдэгдсэн аж.
БЗС-аас зээл авах нь буруу биш. Харин зээл авахдаа улс төрд нөлөө бүхий байдлаа ашигласан уу, зээлийн шалгуурыг хангасан уу, эргэн төлөлт ямархуу байгаа вэ гэдэг нь чухал юм. Энгийн иргэдэд олдоггүй, танил талтайд нь олддог гэгддэг БЗС-ийн зээлийн сонгон шалгаруулалт хэрхэн явагддаг нь олон нийтэд нээлттэй бус. Ийм байдал нь олон нийтэд хардлага үүсгэж байна.
Сэтгэгдэл бичих