Соёлын яамнаас соёлын бүтээгдэхүүн, үйлчилгээний өрсөлдөх чадварыг нэмэгдүүлэх, тэнцвэртэй урсгалыг бий болгох, тогтвортой хөгжлийн төлөөх төр, хувийн хэвшлийн хамтын ажиллагааг бэхжүүлэх зорилгын хүрээнд 2022 оны 11 дүгээр сарын 30- ний өдөр Монголын Үндэсний Худалдаа Аж Үйлдвэрийн танхимын байранд “Аж үйлдвэрийн IV хувьсгал ба соёлын бүтээлч үйлдвэрлэл” зөвлөгөөнийг зохион байгууллаа.
Зөвлөгөөний хамтран зохион байгуулагчаар Монголын Үндэсний Худалдаа Аж үйлдвэрийн танхим, дэмжигч байгууллагаар Дэлхийн банкны “Экспортыг дэмжих төсөл” ажиллаж Эдийн засгийн хөгжлийн яам, Харилцаа холбооны зохицуулах хороо, Нийслэлийн ЗДТГ, 21 аймгийн Соёл урлагийн газрын удирдлага, Монголын Үндэсний Худалдаа Аж үйлдвэрийн танхим болон төрийн болон төрийн бус байгууллагууд, соёлын үйлдвэрлэл эрхлэгчдийн төлөөлөл танхим болон цахимаар хамрагдлаа.
Зөвлөгөөний үдээс өмнөх хөтөлбөр “Үндэсний контентын өрсөлдөх чадвар”, “Соёлын бүтээгдэхүүн, үйлчилгээний тэнцвэртэй урсгал” сэдэв агуулгын хүрээнд зохион явагдлаа. Соёлын яамны Соёлын бүтээлч үйлдвэрлэл, инновацийн хэлтсийн дарга Г.Батхуяг “Үндэсний агуулга, бүтээлч үйлдвэрлэлийг дэмжих боломж, шийдэл”, Харилцаа Холбооны Зохицуулах Хорооны Өргөн нэвтрүүлгийн зохицуулалтын газрын Зохицуулалтын хэрэгжилтийн хэлтсийн дарга Н.Тогтохсүрэн “Өргөн нэвтрүүлэг ба Монгол бүтээлийн нийлүүлэлт”, Эконтэ ХХК - ны ерөнхий продюсер Э.Тамир “Уран бүтээлийг бизнес болгох нь” илтгэлүүдийг танилцуулав.
Салбар хэлэлцүүлэгт “ Бүсчилсэн хөгжил ба соёлын орон зай”, “Бүтээлч хот үндэсний дүр төрх” сэдэв агуулгын хүрээнд зохион байгуулагдсан бөгөөд хэлэлцүүлгийн өмнө Эдийн засаг, хөгжлийн яамны Бүс нутаг, аж үйлдвэрийн бодлогын газрын дарга, доктор Д.Эрдэнэбаяр “Бүсчилсэн хөгжлийн бодлого ба бүтээлч үйлдвэрлэл”, ШУТИС - ийн Бизнесийн ахисан түвшний сургуулийн ахлах багш Доктор, дэд профессор Н.Мөнхөө “Инновацийн кластерийг хөгжүүлэх нь”,СУИС – ийн хөгжлийн хорооны дарга, доктор Ж.Эрхэмтөгс “Бүтээлч хот”, ШУТИС - ийн Бизнесийн удирдлага, хүмүүнлэгийн сургуулийн Технологийн менежментийн салбарын ахлах багш, доктор Н.Бурмаа “Ухаалаг хот ” зэрэг илтгэл тавигдлаа. Зөвлөгөөний салбар хэлэлцүүлэг тус бүрээс гарсан зөвлөмжийг соёлын яам болон холбогдох төрийн захиргааны байгууллагууд хамтран хэрэгжүүлэх төлөвлөгөөг гаргаж, хэрэгжилтийг ханган ажиллах юм.