Сүхбаатар аймагт хоёр дахь жилдээ амжилттай хэрэгжиж буй “Судар эгшиглэн” төслийн оролцогчдын номын тэмдэглэл, бүтээлээр Хүүхдийн номын санд үзэсгэлэн нээгдлээ.
Бүх насны иргэдийг номтой нөхөрлүүлэх, ном шимтэхийн ач холбогдол, үнэ цэнд уриалан дуудах, номоор дамжуулан өөрийн ертөнцөө бүтээхэд нь туслах, дэмжих зорилготой энэхүү төсөл нь СГЗ Г.Мэнд-Ооёогийн нэрэмжит Сүхбаатар аймгийн нийтийн номын сангийн номын санч В.Энхтуяагийн санаачилгаар УИХ-ын гишүүн Н.Ганибал болон Соёлын яамны дэмжлэгтэйгээр 2021 онд анх зохион байгуулагдаж байсан бөгөөд энэ жилээс орон нутгийн дэмжлэгийг авч, жил бүр уламжлал болгон зохион байгуулагдахаар болсон юм.
Төслийг зохион байгуулагч аймгийн номын сангийн зүгээс “Соёлын бүтээлч сар”-ын хүрээнд оролцогчдынхоо дунд бүтээлийн уралдаан зарласнаар нийт 2600 гаруй бүтээл ирүүлснийг ийнхүү нийслэлчүүдэд дэлгэж байна. Уншсан номын тэмдэглэл хөтлөх дэвтэр, үзэгний сав болон үзэг, бал, номын хавчуурга, аяга, унших дуртай ном, товхимол, сонин, сэтгүүл бүхий хуанли, зурагт хуудас зэрэг олон төрлийн бүтээлийг даавуу, цаас, эсгий зэрэг материалаар ширмэл, наамал, оёмол, зүүмэл хэлбэрээр урласан нь нэн сонирхолтой.
Түүнчлэн төсөлд оролцож буй 2881 уншигчийн аяны хүрээнд заавал унших ёстой 20 ном болон өөрийн сонголтоор уншсан нийт 14 мянга орчим тэмдэглэлийн дээжээс бас үзэсгэлэнд дэлгэжээ. Сүхбаатарчууд ном унших соёлд суралцахаас гадна номын тэмдэглэлийг урлагийн бүтээл болтол хөгжүүлж чадсан нь гайхалтай. Энэхүү үзэсгэлэн маргааш /2022.11.29/ орой дуустал тул амжиж үзээрэй.
Сэтгэгдэл бичих