Соёлын сайд Ч.Номингийн урилгаар 9-р сарын 14-19-ний өдрүүдэд “CNN”, “Netflix”, “HBO”, “Warner Bros”, “Paramount Pictures”, “Discovery”, “National Geography”, “Living Films”, “MTV” зэрэг дэлхийн томоохон студи, продакшн, компанийн продюсер болон удирдлагууд АНУ, Их Британи, БНСУ зэрэг орнуудаас Монгол Улсад хүрэлцэн ирлээ.
Монгол Улсын Ерөнхий сайд Л.Оюун-Эрдэнэ, Соёлын сайд Ч.Номин нар тэдний төлөөллийг өнөөдөр хүлээн авч уулзаж Монголын кино урлагийн салбарыг олон улсад сурталчлан таниулах, хамтын ажиллагааг хөгжүүлэх талаар ярилцлаа.
Эдгээр уран бүтээлчид нь Монголын шилдэг кино бүтээгчид, найруулагч, продюсерүүдтэй хамтарсан уран бүтээл хийх тухай санал солилцох, уран бүтээлчдийг дэмжих уулзалтанд оролцохоос гадна Монголын кино уран бүтээлчдийн хийсэн павильон, студи, зураг авалтын талбай, продакшнаар зочилно.
Мөн Монгол Улсад Кино урлагийг дэмжих тухай хууль хэрэгжиж эхэлснээр дэлхийн хэмжээний томоохон продакшн, студитэй хамтран ажиллах, кино бүтээх зардлын буцаан олголтын хөтөлбөрт хамрагдах боломжтой болсон юм. Тиймээс арга хэмжээний үеэр Монгол Улсын зарласан урамшууллын талаарх мэдээллийг танилцуулах, олон улсын туршлагыг судлах, Монгол орны үзэсгэлэнт байгаль, өвөрмөц тогтоц бүхий газар нутгийг үзүүлэх зэрэг ажлыг Соёлын яам, Кино урлагийн зөвлөл хамтран зохион байгуулах юм.
