Засгийн газрын өнөөдрийн ээлжит хуралдаанаар шинэ сэргэлтийн бодлогын хүрээнд гэр хорооллын асуудлыг цогцоор шийдэх загвар боловсруулж, тус хуралдаанд танилцуулахыг Ерөнхий сайдад үүрэг болгосон байна.
Гэр хорооллын бүсэд нийслэлийн 200 мянга гаруй айл өрх амьдардаг. Гэр хорооллын айл өрхийн яндангаас гарч буй утаа Улаанбаатар хотын агаарын бохирдлын нэлээд хувийг бүрдүүлдэг. Мөн ундны усны хангамж, хөрсний бохирдол, нүхэн жорлон, хог хаягдал зэрэг олон асуудал гэр хороололд тулгарсаар байдаг.
Гэвч энэ нь зөвхөн гэр хорооллын айл өрхийн биш нийслэлийн яаралтай шийдвэрлэх ёстой тулгамдсан асуудал нь юм.
Тэгвэл нийслэл хотыг бүрдүүлж буй иргэдийн эрүүл аюулгүй амьдрахад сөргөөр нөлөөлсөн олон асуудлыг ийнхүү цогцоор нь шийдвэрлэхээр загвар боловсруулахаар боллоо.
Цар тахлын үед Монгол Улсын эдийн засаг 1992 оноос хойш хоёр дахь удаагаа -5.3 хувь хүртэл агшсан. Тиймээс Ерөнхий сайд Л.Оюун-Эрдэнэ "Шинэ сэргэлтийн бодлого"-ыг УИХ-д өргөн барьж батлуулсан билээ.
Энэ нь цар тахлын дараах эдийн засгийг тэлэх, босгоход зориулагдсан. Ийнхүү Засгийн газар хөгжлийн том төслүүдийг эхлүүлж, хүртээмжтэй өсөлтийг хангах, экспортыг нэмэгдүүлэх, хөрөнгө оруулалтыг дэмжихэд чиглэгдсэн юм.
"Шинэ сэргэлтийн бодлого"-ыг хэрэгжүүлэхэд эхний ээлжид 57 их наяд, бүрэн хэрэгжүүлэхэд нийт 100-120 орчим их наяд төгрөг шаардлагатай юм байна.
