Зам, тээврийн хөгжлийн яамны Төрийн нарийн бичгийн дарга С.Батболд зургадугаар сарын 13-16-ны өдөр Завхан, Говь-Алтай аймагт ажиллалаа.
Тодруулбал "Бүс нутгийн авто зам хөгжүүлэх төсөл”-ийн хүрээнд хэрэгжүүлэх Улиастай-Алтай чиглэлийн 198 км авто замд Зам, тээврийн хөгжлийн яамны Төрийн нарийн бичгийн дарга С.Батболд, Азийн хөгжлийн банкны төлөөлөгчид, УИХ-ын гишүүн Б.Энх-Амгалан, УИХ-ын гишүүн Ц.Цэрэнпунцаг, замын зураг төслийг боловсруулсан "Ар Си Эс Си” ХХК холбогдох мэргэжилтнүүд, нутгийн захиргааны удирдлагууд авто замын одоогийн нөхцөл байдалтай танилцаж, замын трассын дагуу байгаль орчин, нийгмийн хамгааллын нөлөөллийг тогтоох, холбогдох судалгаа хийх, зураг төсөлд өгөгдсөн трассыг баталгаажуулах, цаашид авч хэрэгжүүлэх арга хэмжээний талаар дүгнэлт боловсруулахаар санал солилцов.
Төрийн нарийн бичгийн дарга С.Батболд замын трассд хамаарах цэгүүд, тээвэрлэлт хийх зай хамгийн богино учир барилгын ажлын өртөг хямд, автомашины хөдөлгөөнд саадгүй, аюулгүй нэвтрүүлэн өнгөрүүлэх боломжтой, тээвэр ашиглалтын зардал бага, зорчих хугацаа хэмнэлттэй, хөдөлгөөний аюулгүй нөхцөл байдлыг хангасан, орон нутгийн тээвэрлэлтээс байгаль орчинд үзүүлж буй сөрөг нөлөөллийг эрс багасгах боломжтой зэрэг олон давуу талтайг холбогдох албаныханд тайлбарлав. Түүнчлэн сонгоод буй трассын гуравдугаар хувилбар нь орон нутгийн иргэдийн санал хүсэлтэд үндэслэн дэмжлэг авсан юм.
Зураг: Замын трассын хувилбарууд
Тус замын барилгын ажлыг эхлүүлж, ашиглалтад оруулснаар Монгол улсын авто замын ирээдүйн сүлжээ болох Арц суурь, Бургастайн хилийн боомт гэсэн босоо тэнхлэгийн авто зам, түүгээр өнгөрөх олон улсын транзит тээвэр өргөжин тэлж, нийгэм, эдийн засгийн өндөр ач холбогдолтой юм.
Эх сурвалж: Зам, тээврийн хөгжлийн яам
