Сибирийн Чита хотын нэгэн өсвөр насны охин дайныг эсэргүүцсэн хэргээр 3.5 жилийн хорих ял сонсчээ. Тодруулбал, түүнийг дайны эсрэг граффити бичиж, цахим хаяг хөтөлсөн хэргээр буруутгасан байна. Энэ нь насанд хүрээгүй хүүхэд дайны эсрэг үзэл бодлоосоо болж шоронд хоригдож буй анхны тохиолдол юм.
17 настай Любовь Лизунова нь 19 настай Александр Снежков, 23 настай Владислав Вишневский нарын хамт 2022 оны аравдугаар сард саатуулагджээ. Лизунова тухайн үед 15 настай байсан гэсэн үг.
Лизунова, Снежков нарыг “Росфинмониторинг” байгууллагаас алан хядагчид болон хэт даврагчдын бүртгэлд оруулсан. Ингэснээр шүүхийн шийдвэргүйгээр тэдний дансыг царцаах боломжтой болдог аж.
Шүүх байгууллага Пүрэв гаригт Лизуноваг хоёр зүйл ангиар буруутган, залуучуудын хорих төвд 3.5 жил хоригдох ял оноожээ. Мөн түүний интернэт ашиглах эрхийг гурван жилээр хассан байна. Харин Снежковыг гурван зүйл ангиар буруутгаж, зургаан жилийн хорих ял оноожээ. Вишневскийг хэт даврах, эвдэн сүйтгэх үйл ажиллагаанд тусалсан хэргээр 1.5 жил хорих болсон байна.
Эх сурвалж: MOSCOW TIMES
Сэтгэгдэл бичих