Брюссель дэх Монгол Улсын Элчин сайдын яамнаас Бельгийн хаант улсад ажиллаж амьдарч буй иргэдэд хандан сэрэмжлүүлэг гаргажээ. Тодруулбал, ирэх даваа гарагт буюу арваннэгдүгээр сарын 23-нд Бельги улс даяар үндэсний хэмжээний эсэргүүцлийн арга хэмжээ зохион байгуулагдах тул монгол иргэдийг жагсаал, цуглаан болж буй газраас аль болох хол байж, олон хүнтэй газраар зорчихдоо бичиг баримт, эд зүйлсээ хамгаалах, эмх замбараагүй байдал, мөргөлдөөн үүссэн тохиолдолд тухайн газраас тайван, аюулгүй холдохыг анхааруулав. Европын Холбооны улс орнуудад 70 гаруй мянган монгол иргэн оршиж сууж буйн 2500 орчим нь тус улсад ажиллаж, амьдардаг гэх статистик бий.
Сэрэмжлүүлэгт:
-Жагсаал, цуглаан болж буй газар болон хүн олноор цугларсан бүсээс аль болох хол байх.
-Шаардлагагүй тохиолдолд жагсаалын бүс рүү очихгүй байх.
-Олон хүнтэй газарт эд зүйлс, гар утас, бичиг баримтаа сайтар хамгаалах.
-Цагдаа, онцгой байдлын байгууллагын заавар, зөвлөмжийг дагаж мөрдөх.
-Эмх замбараагүй байдал, мөргөлдөөн үүссэн тохиолдолд тухайн газраас тайван, аюулгүй холдох.
-Болзошгүй эрсдэлтэй нөхцөл байдалд өөрийгөө болон гэр бүлийнхнээ эрсдэлд оруулахгүй байхад анхаарах
-Мөн дээрх үйл ажиллагаатай холбоотойгоор одоогоор автобус, трамвай, метроны яг аль чиглэлүүдэд саатал гарах, хэр удаан үргэлжлэх нь тодорхойгүй байгаа тул Брюссель хот руу зорчих бол аялал, хөдөлгөөнөө урьдчилан төлөвлөх, боломжтой тохиолдолд өөр төрлийн тээврийн хэрэгсэл сонгох, ажил, хичээл болон бусад чухал уулзалтдаа эрт гарах, нийтийн тээврийн үйлчилгээний шинэ мэдээллийг тогтмол шалгахыг сануулжээ.
Мөн "STIB" байгууллагаас арваннэгдүгээр сарын 23-ны өглөөний 06:00 цагаас эхлэн "Facebook", "Instagram", "WhatsApp", албан ёсны аппликейшн, вэбсайт болон утсаар дамжуулан нийтийн тээврийн нөхцөл байдлын талаар цаг тухайд нь мэдээлнэ. Иргэд та бүхэн сонор сэрэмжтэй байж, зорчих хөдөлгөөнөө урьдчилан төлөвлөн, хувийн болон гэр бүлийнхээ аюулгүй байдлыг нэн тэргүүнд анхаарах болно гэжээ.

Сэтгэгдэл бичих