Авлигатай тэмцэх газрын Урьдчилан сэргийлэх, соён гэгээрүүлэх хэлтсээс соёлын салбарын байгууллагын удирдлага, албан хаагчдад зориулсан “Ашиг сонирхлын зөрчлөөс урьдчилан сэргийлэх нь” сэдэвт сургалт зохион байгууллаа.
Сургалтад Соёл, спорт, аялал жуулчлал, залуучуудын яамны 55, Соёл урлагийн газрын 37, Монголын Үндэсний музейн 45, нийт 137 албан тушаалтан хамрагджээ.
Сургалтаар авлигатай тэмцэх эрх зүйн орчин, авлигын ойлголт, хэлбэр, үүсэх шалтгаан, нөхцөл болон соёлын салбарын шударга байдлын үнэлгээний талаар мэдээлэл өгсөн байна.
Мөн нийтийн албан тушаалтанд тавигдах хориглолт, хязгаарлалт, ашиг сонирхлын зөрчил үүссэн болон үүсэж болзошгүй тохиолдолд мэдэгдэл, тайлбар гаргах үүргийг бодит жишээ, тохиолдолд тулгуурлан тайлбарлажээ.
Түүнчлэн албан тушаалын бүрэн эрхээ хуульд нийцүүлэн хэрэгжүүлэх, шийдвэр гаргах явцад үүсэж болзошгүй авлигын эрсдэлээс сэргийлэх, байгууллагын дотоод хяналт, хариуцлагын тогтолцоог сайжруулах талаар нэгдсэн ойлголт өгч, оролцогчдын асуултад хариулсан байна.
Эх сурвалж: Авлигатай тэмцэх газар
Сэтгэгдэл бичих