Булган аймгийн Хутаг-Өндөр сумын Уньт багт 75 хүүхдийн суудалтай, эрчим хүчний бие даасан эх үүсвэр бүхий “Ногоон сургууль” барьж байна. Сургууль ашиглалтад орсноор багийн хүүхдүүд гэр бүлээсээ холдолгүй, орон нутагтаа суралцах боломж бүрдэх юм.
Боловсролын шинэчлэлийн бодлогын хүрээнд хэрэгжүүлж буй “Багийн бага сургууль-Ногоон сургууль” төслийн барилгын ажил 64 хувийн гүйцэтгэлтэй байна. Сургуулийг 12 дугаар сарын 14-15-нд ашиглалтад оруулахаар төлөвлөжээ.
Боловсролын яам, НҮБ-ын Хүүхдийн сан, ХААН банк, Булган аймгийн Засаг даргын Тамгын газар хамтран хэрэгжүүлж буй төслийн нийт санхүүжилт 1.8 тэрбум төгрөг юм. Үүний 200 сая төгрөгийг аймаг, орон нутгийн төсвөөс гаргахаар шийдвэрлэжээ.
Шинэ сургуулийг эрчим хүчний бие даасан эх үүсвэртэй, байгальд ээлтэй загвараар барьж байгаа нь онцлог. Цахилгаан, дулааны хэрэгцээг 43 нарны цахилгаан үүсгүүр болон 20 кВт-ын хүчин чадалтай эрчим хүч хуримтлуулах системээр хангахаар шийдсэн нь ашиглалтын зардлыг бууруулах давуу талтай. Барилгын ажлыг “Гурван тамир” ХХК гүйцэтгэж байна.
Хутаг-Өндөр сумын Уньт 3 дугаар баг нь сумын төвөөс 47, аймгийн төвөөс 100 км зайд оршдог, 1000 орчим хүн амтай. Тус багт бага ангийн 70-80 орчим хүүхэд амьдардаг бөгөөд сургуулийн багтаамж хүрэлцээгүйгээс зарим хүүхэд сумын төвийн дотуур байранд гэр бүлээсээ тусдаа суралцах, эсвэл эцэг эх нь хүүхдээ дагаж нүүх шаардлагатай тулгардаг байжээ.
“ЭНХАУС” нэр нь эрүүл, ногоон, хүртээмжтэй, аюулгүй, ухаалаг сургуулийн үзэл санааг илэрхийлдэг. “Гэрт ойр сургууль- Хамгийн сайн сургууль” зарчмыг хэрэгжүүлэх тус сургууль ашиглалтад орсноор алслагдсан багийн хүүхдүүд гэрээсээ хол зам туулахгүйгээр чанартай боловсрол эзэмших нөхцөл бүрдэх юм.
Сэтгэгдэл бичих