Бага сургуулийн багшаар ажиллаж байсан Майкл Май технологийн томоохон компаниудад соронзон хальс болон бусад наалддаг бүтээгдэхүүн нийлүүлдэг бизнесээ хөрөнгийн биржид бүртгүүлснээр Хятадын цаасан дээрх тэрбумтнуудын эгнээнд нэгдлээ. Цаасан дээрх тэрбумтан гэдэг нь бодитоор мөнгөө гар дээрээ аваагүй, хувьцааны үнэлгээгээр тэрбумтан болсон гэсэн үг юм.
Австралийн иргэншилтэй, Хонгконгод түр оршин суугч Майн нийт хөрөнгийг 2.5 тэрбум ам.доллар гэж "Forbes" тооцоолжээ.
"Crown New Materials Technology" компани арваннэгдүгээр сарын 3-ны өдөр Шэньжэний хөрөнгийн биржид хувьцаагаа анх арилжаалж эхэлснээр гүйцэтгэх захирал Майкл Май тэрбумтнуудын эгнээнд багтжээ. Тус компани "Tesla", "Apple" зэрэг дэлхийн томоохон брэндэд зориулсан наалдуулагч материал үйлдвэрлэдэг.
Хятадын хоёр дахь том хөрөнгийн бирж болох Шэньжэний хөрөнгийн биржийн мэдээлснээр, тус компанийн анхны санал болгосон нэгж хувьцааны үнэ болох 16.98 юань оргил үедээ 150.58 юань хүрч, 787 хувиар өсжээ. Харин аравдугаар сарын 4-ний өглөөний байдлаар нэгж хувьцааны үнэ 77 юань хүрч тогтворжсон байна.
Майкл Май өдгөө 62 настай. Тэрбээр Жоншан хотод бага сургуулийн багшаар ажиллаж байсан бөгөөд 2000 онд тус хотдоо "Crown New Materials Technology" компаниа байгуулжээ. Майкл Май тэрбумтнуудын жагсаалтад ганцаараа багтаагүй. Түүний дүү Май Хуйшя компанийн дэд захирлаар ажилладаг бөгөөд хоёр тэрбум ам.долларын хөрөнгөтэйгөөр жагсаалтад нэгдсэн байна.
"Crown New Materials Technology" компани нь Хятад болон Вьетнамд нийт таван үйлдвэртэй. Автомашины дээврээс эхлээд ухаалаг гар утасны хагас дамжуулагч хүртэлх төрөл бүрийн хэрэглээний бүтээгдэхүүний эд ангиудыг хооронд нь холбох, бэхлэх зориулалттай бүтээгдэхүүнийг тэдгээр үйлдвэрт үйлдвэрлэдэг.
Сэтгэгдэл бичих