Та Өмнөд Солонгосын Инчон олон улсын нисэх буудлын ариун цэврийн өрөөг хараад цочирдож байв уу. Тэгвэл та ганцаараа биш шүү. Тус нисэх буудлын ариун цэврийн өрөө Өмнөд Солонгосын ерөнхийлөгчийн нэрэмжит шилдэг ариун цэврийн өрөө шагналын эзэн болжээ. Тодруулбал, "Terminal 2"-ийн татваргүй барааны хэсэгт, "Gate 225"-ын ойролцоо байдаг ариун цэврийн өрөө энэ шагналыг хүртлээ. Уг ариун цэврийн өрөө нь шалнаасаа тааз хүрсэн цэлгэр цонхтой бөгөөд хөөрч, бууж буй онгоцнуудыг харах боломжтой.
Өмнөд Солонгос улсад ийм шагналыг 28 дахь жилдээ олгож байна. Шагналыг олгохдоо тухайн ариун цэврийн өрөөний ариун цэвэр, тав тух, аюулгүй байдал, загвар, засвар үйлчилгээ гэсэн хүчин зүйлүүдийг харгалзан үздэг.
Инчоны "Geomam" өртөө хиймэл оюун ухаанд суурилсан аюулгүй байдлын хяналтын системтэй ариун цэврийн өрөөгөөрөө мөн шагналт байранд оров. Хойд Кёнсан мужийн Гүми дахь "Sagok" өртөө болон Ганвон мужийн Пёнчан дахь "Jinbu" өртөө мөн шагналт байранд багтжээ.
Өнгөрсөн жилийн тэргүүн шагналыг Солонгосын төмөр замын харьяа Сөүл өртөөний хоёрдугаар давхрын ариун цэврийн өрөө хүртсэн байна. Тус ариун цэврийн өрөөг аялагч жуулчдад ээлтэй гэж үзсэний дээр дараалал ихтэй үед хүлээх талбайг зохистой зохицуулж өгснөөрөө уг шагналын эзэн болжээ.
Дотоод хэрэг, аюулгүй байдлын яам болон Солонгосын ариун цэврийн өрөөний соёлын холбооноос зохион байгуулсан уг уралдаанд энэ жил орон нутгийн засаг захиргааны нэгж, байгууллагуудаас нийт 74 ариун цэврийн өрөө өрсөлджээ. Тус холбоо нь цахим форум ч ажиллуулдаг. Хүмүүс тус форум дээр хамгийн сайн, хамгийн муу ариун цэврийн өрөөнүүдийн талаарх санал сэтгэгдлээ хуваалцдаг ажээ.
Сэтгэгдэл бичих