Цахим хөгжил, инноваци, харилцаа холбооны яамнаас НҮБ-ийн Хөгжлийн хөтөлбөртэй хамтарч “Монголын хүүхэд өсвөр үеийнхний дундах цахим дээрэлхэлт” гэсэн сэдвээр судалгаа хийжээ. Уг судалгаанаас харахад цахим дээрэлхэлт ганц монгол хүүхдүүдэд тулгарч буй асуудал биш, дэлхийн зовлон болсон гэдгийг онцолж байна.  Тиймээс Европын улс орнууд хүүхэд, багачууд, өсвөр үеэ  нийгмийн сүлжээний хортой, сөрөг бүхнээс хамгаалсан хууль баталж, хэрэгжүүлснээр олон сайн туршлага хуримтлуулсан байна.

Дэлхийн хэмжээнд хүүхэд, өсвөр насныхны  10–14 хувь нь цахим дээрэлхэлтийн хохирогч болдог гэсэн судалгааны дүн гарчээ. Бодит байдал дээр үүнээс ч өндөр тоо гарах магадлалтай аж.

Тухайлбал, Хятадад гэхэд л өсвөр насныхны 56.9 хувь нь цахим дээрэлхэлтийн хохирогч, 34.9 хувь нь дээрэлхэгч гэсэн судалгааны дүгнэлт гаржээ. Хятад хүүхдүүдийн цахим дээрэлхэлтэд өртдөг хамгийн  нийтлэг хэлбэр нь хэн нэгнийг чат өрөөнөөс албаар хөөх явдал гэнэ. Тайланд хүүхдүүдийн 59 хувь нь сард дор хаяж нэг удаа цахим дээрэлхэлтэд өртсөн  гэх судалгаа гарчээ.  Филиппинд 395 оролцогчтой судалгаа хийхэд  334 нь  цахим дээрэлхэлтийн хохирогч гэдгээ онцолсон байх юм.

Монгол Улсын хувьд “Хүүхдийн тусламжийн 108 утасны төв”-д цахим дарамт шахалтын талаар ирсэн дуудлагын тоо 2016 онд 85 байсан бол 2018 онд 229 болж огцом өсчээ. 2023 онд 14–18 насны өсвөр үеийнхний дунд судалгаа хийхэд 30 хувь  нь цэвэр цахим дээрэлхэлтийн хохирогч болсноо мэдүүлснээс монгол хүүхдүүдийн дунд цахим дээрэлхэлт яаж  дэлгэрснийг харчихаж болно.

Цахим дээрэлхэлтэд өртсөн хүүхдүүд  хэт гуниглах болон түгшүүрт эмгэгт өртөж,  өөрийгөө үнэлэх үнэлэмжээ алдаж, сурлага нь эрс муудсаныг Цахим хөгжлийн яам, НҮБ-ийн Хөгжлийн хөтөлбөр  хамтарсан судалгаанд дурьдагдсан нь анхаарал татсан асуудал болж байна.

Тэгэхээр Цахим хөгжил, инноваци, харилцаа холбооны  сайд Ч.Номин нарын санаачилж боловсруулсан Нийгмийн сүлжээнд хүүхдийн оролцоог зохицуулах тухай хуулийн төслийг батлах гарцаагүй шаардлага УИХ-ын өмнө ирчихсэн байна. Уг хуулийн төсөлд 13 хүртэлх  насныхныг фэйсбүүк гэх мэт цахим сүлжээнд орохыг бүрэн хориглох, 13-16 насныхныг цахим сүлжээнд технологийн хязгаартай оруулах зохицуулалтыг тусгаад байгаа юм. Тодруулж хэлбэл, өсвөр насныхан цахим сүлжээнд ороход насанд хүрэгчид рүү чиглэсэн онц ноцтой гэмт хэрэг, ёс бус үйлдлийг харуулсан видео  гэх мэт хар бараан, хортой агуулгатай  мэдээллүүд  харагдахгүй гэсэн үг. Европын улсууд бараг бултаараа УИХ-ын гишүүн, Цахим хөгжлийн сайд Ч.Номин нарын санаачилсан шиг ийм хуулийг баталж, хүүхдүүдээ цахим дээрэлхэлт гэх мэт нийгмийн сүлжээний хортой сөрөг нөлөөлллөөс хамгаалж байгааг энэ дашрамд зориуд тодотгон онцолъё.