Улаанбаатар хотод 2026 оны аравдугаар сарын 19-ний байдлаар гол нэрийн зарим барааны үнэ өмнөх долоо хоногоос 0.2 хувиар буурсан байна. Энэ нь өмнөх сартай харьцуулбал 2.1 хувиар өссөн үзүүлэлт гэдгийг Үндэсний статистикийн хорооноос мэдээлэв.
Үндэсний статистикийн хорооны мэдээллээр, “Номин” супермаркетад нэг килограмм луувангийн үнэ 2,748 төгрөгөөс 3,598 төгрөг болж, өмнөх долоо хоногтой харьцуулахад 31 хувиар өсжээ. Мөн хүрэн манжингийн үнэ 1,898 төгрөгөөс 2,448 төгрөг болж, 29 хувиар нэмэгдсэн байна.
Харин үхрийн ястай махны үнэ нэг килограмм нь 32,480 төгрөгөөс 27,980 төгрөг болж, 13.9 хувиар буурчээ. Үхрийн цул махны үнэ 33,980 төгрөгөөс 29,980 төгрөг болж, 11.8 хувиар хямдарсан байна.
“Хархорин” захад хүрэн манжингийн үнэ 3,500 төгрөгөөс 3,000 төгрөг болж, 14.3 хувиар буурчээ. “Бөмбөгөр” худалдааны төвд хонины ястай махны үнэ 25,000 төгрөгөөс 24,000 төгрөг болж, дөрвөн хувиар буурсан байна.
Үүнээс гадна “Миний сүлжээ” супермаркетад “Алтан тариа” савласан хоёрдугаар зэргийн гурилын үнэ нэг килограмм нь 1,290 төгрөгөөс 1,530 төгрөг болж, 18.6 хувиар өсжээ. “Имарт” худалдааны төвд 300 грамм хар талхны үнэ 3,050 төгрөгөөс 3,500 төгрөг болж, 14.8 хувиар нэмэгдсэн байна. Харин нийт үнийн өөрчлөлтөөр сонгинын үнэ өмнөх долоо хоногоос 7.7 хувь, хонины ястай махны үнэ 2.5 хувиар буурсан байна.
Сэтгэгдэл бичих