Дүүргийн эрүү, иргэний хэргийн хялбар ажиллагааны шүүх гомдлыг хэлэлцэж Сэтгүүлч Т.Шинэбаярыг суллаж, хилээр гарахыг хориглосон шийдвэр гаргажээ. Тодруулбал, Тус шүүхэд Нийслэлийн Прокурорын газраас яллагдагч Т.Шинэбаярт цагдан хорих таслан сэргийлэх арга хэмжээ авах санал гаргасныг шүүх хянан хэлэлцээд, прокурорын саналыг хангаж, цагдан хорих таслан сэргийлэх арга хэмжээ авч шийдвэрлэжээ.
Шүүгчийн захирамжийг эс зөвшөөрч гаргасан яллагдагчийн өмгөөлөгчийн гомдлыг Ерөнхий шүүгч хянаад яллагдагчийн эрүүл мэндийн байдлыг харгалзан түүнд авсан цагдан хорих таслан сэргийлэх арга хэмжээг өөрчилж, хязгаарлалт тогтоох таслан сэргийлэх арга хэмжээ авч шийдвэрлэв.
Т.ШИНЭБАЯРЫН ЦАГДАН ХОРИОГ ЦУЦЛАХ ЭСЭХИЙГ ХЭЛЭЛЦЭНЭ
Дэнс.мн сайтын сэтгүүлч Т.Шинэбаярыг ЕТГ-ын Хэвлэл мэдээллийн албаны дарга Ц.Ганзоригийн гомдлын дагуу өнгөрсөн Бямба гаригийн /2026.10.10/ үүрээр 48 цагийн хугацаатай баривчилсан. Улмаар прокурорын саналын дагуу Даваа гаригаас эхлэн 30 хоногийн хугацаатай цагдан хорьсон байдаг.
Тэгвэл энэ шийдвэрийг эсэргүүцэж, Т.Шинэбаяр болон түүний өмгөөлөгч нар Ерөнхий шүүгчид гомдол гаргасан бөгөөд өнөөдөр 16.00 цагаас Дүүргийн эрүү, иргэний хэргийн хялбар ажиллагааны шүүхэд гомдлыг хэлэлцэхээр болсон байна.
Түүнчлэн шүүх хуралд Т.Шинэбаярыг өөрийн биеэр оролцуулах хүсэлтийг түүний өмгөөлөгч гаргажээ. Нийслэлийн Прокурорын газраас сэтгүүлч Т.Шинэбаярыг Эрүүгийн хуулийн 23.7 дугаар зүйлд заасны дагуу "нийтийн албан тушаалтныг заналхийлэх" гэдэг зүйл ангиар эрүүгийн хэрэг үүсгэж яллагдагчаар татсан байдаг.
Сэтгэгдэл бичих