БОУАӨЯ, ШУА-ийн Биологийн хүрээлэн хамтран хөрсний бохирдлыг багасгах 5 жишиг төсөл хэрэгжүүлж байна.
Төслийн хүрээнд нийслэлийн Баянзүрх дүүрэгт орших Да Хүрээ авто худалдааны төв орчмын хөрснөөс 20 цэгт дээж авч эрүүл ахуйн бохирдлыг гэдэсний савханцар, гэдэсний бүлгийн эмгэг төрүүлэгч нян, агааргүйтэн нян үзүүлэлтээр харьцуулан био бэлдмэлийг ашиглахын өмнөх болон дараах үр дүнг үнэлжээ.
Хот, суурин газрын хөрсний эрүүл ахуйн аюулгүйн үзүүлэлт, бохирдлыг үнэлэх стандартаар шинжлэхэд биобэлдмэл хэрэглэхээс өмнө 20 цэгийн 10 нь их, 7 нь дунд, 2 нь бага бохирдолтой, нэг нь цэвэр ангилалд байсан бол хэрэглэсний дараах шинжилгээгээр нэг нь их, 2 нь дунд, 7 нь бага бохирдолтой болсныг БОУАӨЯ мэдээлэв.
Судалгаанд хамрагдсан 20 цэгийн 19-д хөрсний бактерийн тоо багассан байна. Тухайлбал био бэлдмэл хэрэглэсний дараа шинжлэхэд мөөгөнцөртэй 11 цэг 3 болж багассан бол термофилийн бичил биетний тоон агууламж 16 цэгээс 14-д дахин илэрсэн ч 10-100 дахин багасжээ.
Сэтгэгдэл бичих