Европын аюулгүй байдал, хамтын ажиллагааны байгууллагын (ЕАБХАБ) Хэвлэлийн эрх чөлөөний асуудал эрхэлсэн Төлөөлөгчийн газраас зохион байгуулдаг Төв Азийн хэвлэл мэдээллийн 26 дугаар бага хурал Бүгд Найрамдах Киргиз Улсын нийслэл Бишкек хотноо өнөөдөр эхэллээ.
Энэ жилийн хурал “Нэгдмэл бодит байдлыг бүрдүүлэх нь: Дижитал эрин үе дэх мэдээллийн бүрэн бүтэн байдал, хэвлэл мэдээллийн ёс зүй ба итгэлцэл” гэсэн сэдвийн дор болж байна.
Тус бага хуралд Казахстан, Киргиз, Тажикистан, Туркменистан, Узбекистан болон Монгол Улсын сэтгүүлчид, хэвлэл мэдээллийн салбарын шинжээчид, хуульчид, төрийн болон иргэний нийгмийн байгууллагын төлөөлөгчид жил бүр оролцдог уламжлалтай.
ЕАБХАБ-ын үйл ажиллагаанд оролцогч улс орнуудад ээлжлэн зохион байгуулдаг энэхүү хурал нь хэвлэл мэдээллийн эрх чөлөөний чиглэлээрх тус байгууллагын үүрэг, амлалтыг хэрэгжүүлэх, түүнчлэн хэвлэл мэдээллийн ёс зүй болон мэдээлэл үнэн зөв, бүрэн гүйцэд, зөвшөөрөлгүйгээр өөрчлөгдөөгүй байх буюу мэдээллийн бүрэн бүтэн байдлыг хангах замаар нийгэм дэх итгэлцлийг бэхжүүлэхэд чиглэсэн яриа хэлэлцээ, хамтын ажиллагааг өргөжүүлэх зорилготой юм.
Энэ удаагийн бага хурлаар
• Итгэлцэлд тулгуурласан мэдээллийн орчныг бүрдүүлэх нь
• “Томоохон технологийн платформ ба хиймэл оюуны эрин үе дэх хэвлэл мэдээллийн эрх чөлөөний бодлогын гарын авлага”-ыг Төв Азид хэрэгжүүлэх арга зам
• Төв Азийн мэдээллийн бүрэн бүтэн байдал: Эрх зүйн зохицуулалт ба хэрэгжилт
• Сэтгүүлчдийн цахим аюулгүй байдал: Хүйсийн онцлогийг харгалзан хамгаалалтын механизмыг бэхжүүлэх нь
• Хувьсан өөрчлөгдөж буй дэлхий ертөнц дэх сэтгүүл зүйн боловсрол ба мэргэжлийн стандарт
• Мэдээллийн редакцад хиймэл оюун ухаан ашиглах бодлого гэсэн үндсэн сэдвүүдээр хэлэлцүүлэг өрнүүлж байна.
Түүнчлэн бүс нутгийн хэвлэл мэдээлэл, сэтгүүл зүйд тулгамдаж буй асуудлууд, хэвлэлийн эрх чөлөөний өнөөгийн нөхцөл байдлыг хэлэлцэж, нээлттэй, хүртээмжтэй, бодитой мэдээллийн экосистемийг бэхжүүлэх арга замыг тодорхойлно.
Сэтгэгдэл бичих