Гаалийн хяналт шалгалт хийхдээ албан тушаалаа урвуулан ашиглаж, хахууль авсан гаалийн улсын 7 байцаагчид тус бүр нэг жилийн хорих ял оногдуулж, төрийн албанд ажиллах эрхийг нь хассан байна.
Авлигатай тэмцэх газрын Мөрдөн шалгах хэлтсээс гаалийн улсын байцаагч, гаалийн итгэмжлэгдсэн төлөөлөгч, тээвэрлэгч нарт холбогдох эрүүгийн хэргүүдийг шалгажээ. Тус байгууллагаас гаалийн улсын байцаагчид бүрэн эрх, албан тушаалын байдлаа урвуулан ашиглаж, бараа тээвэрлэгч аж ахуйн нэгжүүдийн ашиг сонирхлын үүднээс гүйцэтгэх ёсгүй үйлдлийг хийж, үргэлжилсэн үйлдлээр хахууль авсан байж болзошгүй хэргийг 2026 оны тавдугаар сард илрүүлэн шалгасан байна.
Мөрдөн шалгах ажиллагааны хүрээнд 24 эрүүгийн хэрэгт гаалийн улсын байцаагч 40, гаалийн итгэмжлэгдсэн төлөөлөгч 31 буюу нийт 71 хүнийг яллагдагчаар татжээ.
Шүүхээр шийдвэрлэгдсэн хэргүүдээс гаалийн улсын 7 байцаагчид хахууль авсан гэмт хэрэгт нэг жилийн хорих ял оноож, төрийн албанд ажиллах эрхийг нь хассан байна.
Мөн хахууль өгсөн гаалийн итгэмжлэгдсэн төлөөлөгч зургаан хүнд тус бүр 2.7 сая төгрөгийн торгох ял, нэг хүнд 4 сая төгрөгийн торгох ял оноожээ. Харин хахууль авах, өгөх гэмт хэрэгт холбогдсон нэг гаалийн улсын байцаагч, нэг итгэмжлэгдсэн төлөөлөгчид тус бүр 1 жил 1 хоногийн хорих ял оногдуулсан байна.
Одоогоор Дорноговь аймгийн Замын-Үүд сум дахь Сум дундын шүүхэд нэг эрүүгийн хэрэг, Нийслэлийн прокурорын газарт 18 хүнд холбогдох гурван эрүүгийн хэрэг шүүхэд шилжихээр хянагдаж байгаа бол дөрвөн хэрэгт мөрдөн шалгах ажиллагаа үргэлжилж байна.
Эх сурвалж: Авлигатай тэмцэх газар
Сэтгэгдэл бичих