Монголын үндэсний кино урлагийн зөвлөлөөс “Академи авардс” буюу 99 дэх удаагийн “Оскар”-ын шагнал гардуулах ёслолын урьдчилсан шалгаруулалтад Монгол Улсыг төлөөлөн оролцох бүтээлээр “Тусгаар тогтнол: Бошиг сахигч” киног сонгосон байна.
Кино урлагийн зөвлөлийн мэдээлэлд, “Тус хорооныхон ирүүлсэн кино бүтээлүүдтэй танилцаж, хоёр хоногийн өмнө санал хураалтыг эцэслэн 99 дэх удаагийн “Академи Авардс” буюу “Оскар”-ын шагнал гардуулах ёслолын “Олон улсын шилдэг бүрэн хэмжээний кино” төрлийн урьдчилсан шалгаруулалтад Монгол Улсыг төлөөлөн оролцох бүтээлээр найруулагч Б.Тамирын “Тусгаар тогтнол: Бошиг сахигч” (Independence: The Keeper of the Decree) уран сайхны киног шалгарууллаа” хэмээн дурджээ.
Энэхүү киноны зохиолыг зохиолч Тодко Самсон буюу Т.Мягмартогтох бичсэн бол Б.Тамир найруулсан юм. Уг бүтээл өнгөрсөн онд Кино урлагийг дэмжих сангаас эргэн төлөх нөхцөлгүйгээр 158 сая төгрөгийн санхүүжилт авч байв. “Тусгаар тогтнол” бошиг сахигч түүхэн уран сайхны киног төслийн багийнхан Үндэсний эрх чөлөөний хөдөлгөөний 115 жилийн ойд зориулан бүтээсэн байдаг.
Киноны танилцуулгад өнөөгийн Монголын тусгаар тогтнолын үндсийг хэн тавьсан, тэдний хувь заяа ямар байсан, тухайн үеийн ихэс дээдсийн гаргасан сонголт, түүний цаадах нууц болон золиос зэрэг үйл явдлыг хөндсөн талаар дурдсан байна. Гол дүрд жүжигчин, найруулагч Б.Тамир, МУГЖ Г.Эрдэнэбилэг, Ардын жүжигчин С.Сарантуяа, Төрийн шагналт, Хөдөлмөрийн баатар Н.Сувд, жүжигчин Б.Одончимэг, А.Ганчимэг, Э.Тодгэрэл нар тоглосон юм. Тухайлбал, Г.Эрдэнэбилэг Эрдэнэ дайчин хошой Чин ван Ханддоржийн, Б.Тамир Сайн ноён хан Намнансүрэнгийн дүрийг бүтээсэн юм.
Сэтгэгдэл бичих