Онцгой байдлын байгууллагын алба хаагчид иргэдийг нийтийн биеийн тамир, идэвхтэй хөдөлгөөнд уриалан бүх нийтийн өглөөний дасгалыг эхлүүллээ.
Тодруулбал, өнөөдөр 07:20-08:00 цагт Онцгой байдлын ерөнхий газар, нийслэлийн хүрээний Онцгой байдлын анги, салбарын 300 алба хаагч Д.Сүхбаатарын талбайд бүх нийтийг биеийн тамирын дасгал хөдөлгөөнд уриалан өглөөний дасгал хийв. Өглөөний дасгалд Монголын Улаан Загалмайн Нийгэмлэгийн сайн дурын идэвхтэн хүүхдүүд болон сурагчид идэвхтэй хамрагдсан байна.
Монгол хүний чанартай дундаж наслалтыг нэмэгдүүлэх, эрүүл мэндийг дэмжих, өвчлөлөөс урьдчилан сэргийлэх, эрүүл амьдралын хэв маяг, зөв зан үйлийг төлөвшүүлэх зорилготой Монгол Улсын Ерөнхийлөгчийн санаачилсан “Эрүүл монгол хүн” үндэсний хөдөлгөөний хүрээнд энэхүү өглөөний дасгалыг эхлүүлж буй ажээ.
Алба хаагчдын уриалж буй бүх нийтийн биеийн тамирын дасгалын үеэр Онцгой байдлын ерөнхий газрын дарга, хошууч генерал Г.Ариунбуян, “Биеийн тамирын дасгал хөдөлгөөн нь зөвхөн тамирчид, спортоор хичээллэдэг хүний бэлтгэл бус, иргэн бүрийн идэвхтэй, эрүүл амьдралын дадал хэвшил болох нь чухал. Алба хаагчдын хувьд дасгал хөдөлгөөн тогтмол хийдэг аврагч, гал сөнөөгчдийн энгийн дасгал хөдөлгөөн хийдэггүй алба хаагчтай харьцуулахад гэмтэл авах эрсдэл 25-30 хувь бага, стрессийн түвшин 20-40 хувь доогуур, мөн үе мөч, нурууны гэмтлийн тохиолдол 15-25 хувь бага байдгийг олон улсын судалгаагаар тогтоосон байдаг” хэмээн онцоллоо.
Онцгой байдлын байгууллагын алба хаагчид улсын хэмжээнд эрүүл мэнд, бие бялдрыг чадавхжуулах зорилгоор ажлын өдрийг 10 минутын өглөөний дасгалаар эхлүүлж хэвшээд байна. Өглөөний дасгалыг Д.Сүхбаатарын талбайд энэ сарын 29, 30-нд 07:20-08:00 цагт хийх бөгөөд албан байгууллага, иргэдийг идэвхтэй оролцож, нэгдэхийг уриалж байна.
Сэтгэгдэл бичих