Ховд аймагт ингэний сүү боловсруулах үйлдвэр шинээр байгуулна.
Үйлдвэрийн барилга угсралтын ажлыг гүйцэтгэх компани тодорч, энэ сарын 16-нд “Ван юань Монгол сүү” ХХК болон “Хотгор гоулд констракшн” ХХК хамтын ажиллагааны гэрээ байгуулжээ.
Гэрээ байгуулах үеэр Ховд аймгийн Засаг дарга М.Амарсанаа оролцож, “Миний хэрэгжүүлэх нэг чухал ажил бол ингэний сүү боловсруулах үйлдвэр байгуулж, хүүхэд багачууд, иргэдийг эрүүл мэндийн ундаа болсон экологийн цэвэр бүтээгдэхүүнээр хангахын зэрэгцээ малчдын орлогыг нэмэгдүүлэх явдал. Хөрөнгө оруулагчаа олж, саяхан үйлдвэрийн барилгын шав тавьсан. Зорьсон ажил алхам алхмаар урагшилж байгаад таатай байна” гэлээ.
Үйлдвэрийн төсөл 10 га талбайг хамрах бөгөөд барилга байгууламж 11 мянга гаруй ам.метр талбайтай байна. Тус үйлдвэрт ингэний сүү үйлдвэрлэх цех, хуурай сүүний цех, агуулахын төв, оффисын барилга байгууламжийг нэг дор төлөвлөснөөр ингэний сүү үйлдвэрлэх орчин үеийн бааз бий болох юм.
Үйлдвэрийн барилгыг нэг жилийн хугацаанд барьж ашиглалтад оруулахаар төлөвлөж байна.
Сэтгэгдэл бичих