Прокурорын байгууллагаас 2026 оны наймдугаар сарын байдлаар Эрүүгийн хуулийн 17.12 дугаар зүйлд заасан “мал хулгайлах” гэмт хэрэгт яллагдагчаар татагдсан 270 хүнд холбогдох 154 хэрэгт яллах дүгнэлт үйлдэж, шүүхэд шилжүүлжээ.
Үүнээс Архангай аймгийн прокурорын газар наймдугаар сарын 28-нд 334 тооны мал хулгайлж, 30 иргэнд 113 сая төгрөгийн хохирол учруулсан 27 хүнд холбогдох хэргийг шүүхэд шилжүүлсэн байна.
Тодруулбал, П.Т нарын нэр бүхий 27 яллагдагчийн 14 нь өмнө нь эрүүгийн хариуцлага хүлээж байсан бөгөөд 2014-2026 онд Архангай, Төв, Булган аймгийн нутаг дэвсгэрт дангаараа болон бүлэглэн олон тооны мал хулгайлсан гэх хэрэгт холбогджээ.
Тэд бусдын орон байранд нэвтэрч эд хөрөнгө хулгайлан 27 иргэнд 74 сая төгрөгийн хохирол учруулсан, хулгайлах гэмт хэргийг байнга үйлдэж, амьжиргааны эх үүсвэр болгосон, залилан мэхэлсэн болон бусдын эрүүл мэндэд хөнгөн хохирол санаатай учруулсан зэрэг гэмт хэрэг үйлдсэн.
Прокуророос тэдэнд хулгайлах, мал хулгайлах, залилах, тээврийн хэрэгслийг зөвшөөрөлгүй авч явах, мөнгө угаах, хүний эрүүл мэндэд хөнгөн хохирол учруулах гэмт хэрэгт холбогдох зүйл ангиар яллах дүгнэлт үйлдэж, хэргийг Архангай аймаг дахь сум дундын анхан шатны шүүхэд шилжүүлжээ.
Эх сурвалж: Монгол улсын ерөнхий прокурорын газар
Сэтгэгдэл бичих