Эрүүл мэндийн сайд Э.Батшугар өнөөдөр /2026.09.07/ цаг үеийн асуудлаар мэдээлэл өглөө.
Тэрбээр хөнгөлөлттэй эмийн талаар мэдээлэхдээ:
“Бид өнгөрсөн онд 152 орчим тэрбум төгрөгийг хөнгөлөлттэй эмэнд зарцуулсан. Үүнтэй холбоотойгоор 2027 оны төсөвт 70 тэрбум төгрөг нэмж тусгаж байгаа.
Энэ мөнгийг юунд зарцуулах вэ гэхээр ахмад настнуудын хамтын төлбөрийг болиулах зорилготой. Ахмад настан, хүүхэд, хөгжлийн бэрхшээлтэй иргэдийн эмийн хүртээмжийг нэмэгдүүлэхийн зэрэгцээ хамгийн сайн чанартай эмийг оруулж ирэхээр ажиллаж байна.
ДЭМБ-ын хатуу зохицуулалттай эмүүдийг нэгдсэн худалдан авалт болон нэг эх үүсвэрийн худалдаагаар оруулж ирэх зорилт тавьсан.
Хөнгөлөлттэй эмийн гаалийн баримтыг судалсан. Цаашлаад и-баримтаар жижиглэн худалдаалсан мэдээллийг нь авч үзэж судалсан. Өнгөрсөн оны 152 тэрбум төгрөгийн зардлаас харахад 20 орчим хувийг эмийн бөөний төвүүд, эм хангамжийн байгууллагууд ашиг болгон авч байна. Мөн 20 гаруй хувийг эмийн сангууд ашиг олж байна. Монгол Улсад 4300 орчим эм эргэлдэж байна. Төрөөс хөнгөлдөг болон төрөөс даадаг 669 эм дээр битгий ашиг хийгээч ээ. Зардал гарч байгааг ойлгож байна. Эм хангамжийн цэгүүд дээр тодорхой хэмжээгээр тааз үнэ тогтоож байгаа. Харин эмийн сангуудад очихоор нэг удаа үйлчилгээ авсан гэх тодорхой мөнгөн дүнг нэмж авч байна. Ирэх жил 220 тэрбум төгрөгийн төсөвтэй болно. Тэр мөнгийг эмийн хүртээмжийг нэмэгдүүлэхэд зарцуулж, хамтын төлбөрөөс чөлөөлөх шийдвэр гаргасан. Лавлагаа шатлалын эмнэлгүүдээс хамгийн олон оношлогдож байгаа өвчлөлийг тодорхойлоод, түүнд зориулсан эмийг мөн чөлөөлж байгаа. Ахмад настнуудын төлбөрийн нэлээдгүй хувь нь хамтын төлбөрт зарцуулагдаж байна. Хамтын төлбөрөөс чөлөөлчихвөл ахмадын бодит орлого нэмэгдэнэ” гэв.
Сэтгэгдэл бичих