2026-2027 оны хичээлийн жилийн бэлтгэл ажил, зохион байгуулалтын талаар олон нийтэд мэдээлэл өгөх үеэр Нийслэлийн Боловсролын газрын дарга Б.Амартүвшин сургалтын орчин, бага, ахлах боловсролын зохион байгуулалтад хийх өөрчлөлтийн талаар дараах мэдээллийг хүргэлээ.
Тодруулбал, энэ жилээс цэцэрлэгийн зориулалтаар ашиглаж буй зарим барилгын ашиглалтын түвшин харьцангуй бага байгааг харгалзан ерөнхий боловсролын сургуулийн 1 дүгээр ангийн сурагчдыг хичээллүүлэх зориулалтаар ашиглаж эхэлж байна. Ингэснээр хүүхдүүдийг гэрт нь ойр сургуульд суралцуулахын зэрэгцээ хотхон бүрд бага сургуулийн зохион байгуулалтыг бий болгох боломж бүрдэх юм.
Энэ хүрээнд нийт 22 сургалтын зориулалттай барилгыг ашиглалтад бэлтгэж байна. Үүнээс таван цэцэрлэгийн зориулалттай барилгыг бага сургууль болгон зохион байгуулж, 1 дүгээр ангийн сурагчдыг хичээллүүлэхээр төлөвлөжээ. Мөн боловсролын зориулалттай 17 барилгыг нэмэлтээр ашиглахаар болсон. Үүний 10 нь өмнө нь цэцэрлэгийн зориулалтаар ашиглаж байсан барилга байна.
Цаашид цэцэрлэгийн насны хүүхдийн тоо буурч байгаатай уялдуулан цэцэрлэгийн зориулалттай барилга, объектыг бага ангийн, тэр дундаа 1 дүгээр ангийн сургалтад үе шаттай шилжүүлж, иргэдэд ойр, хүртээмжтэй сургалтын орчныг бий болгоно.
Суурь боловсролын түвшинд сурагчид нийтлэг, ижил хөтөлбөрөөр суралцахын зэрэгцээ ахлах боловсролын түвшинд ирээдүйд эзэмших мэргэжил, сонирхож буй чиглэлээсээ хамааран сонгон суралцах боломжтой төрөлжсөн ахлах сургуулиудыг хөгжүүлэхээр ажиллаж, эхний ээлжид төрийн өмчийн олон улсын хөтөлбөртэй сургуулиудыг ахлах сургууль болгон хөгжүүлж, элсэлтийн тоог нэмэгдүүлэхээр төлөвлөжээ.
Хөтөлбөрийн шинэчлэлийн хүрээнд дунд боловсролын олон улсын үндэсний хөтөлбөрийн нийцэл, уялдаа сайжирсан тул эдгээр сургуулийг ахлах боловсролын чиглэлээр хөгжүүлэх боломж бүрдэж, их, дээд сургуулийн дэргэдэх төрөлжсөн ахлах сургуулиудыг хөгжүүлэхээр ажиллаж байна. Эдгээр сургуулийн хөтөлбөр, сургалтын төлөвлөгөө, зохион байгуулалтад шинэчлэл хийж байгаа ба зорилго нь тухайн их сургуулийн дэргэдэх төрөлжсөн ахлах сургуульд суралцсан хүүхэд тус их сургуульд элсэн суралцахад тодорхой давуу тал бий болгох юм.
Тухайлбал, ахлах, их сургуулийн сургалтын хөтөлбөр, кредитийг харилцан дүйцүүлэн тооцох замаар суралцах хугацааг нэг жилээр хэмнэх, улмаар их сургуулийн сургалтад илүү сайн бэлтгэсэн байх боломжийг бүрдүүлнэ. Мөн их, дээд сургуулийн хөтөлбөрийг зөвхөн өөрийн үндсэн байранд бус, шаардлагатай орчин, нөхцөлийг бүрдүүлсэн бусад сургууль, сургалтын байранд хэрэгжүүлэх боломжтой.
Цаашид нийслэлийн дүүрэг бүрд төрөлжсөн ахлах сургуулиудыг байгуулахаар ажиллаж байна. Тухайн дүүргийн нийгэм, эдийн засгийн онцлог, хөдөлмөрийн зах зээлийн хэрэгцээ, иргэдийн эрэлт, сонирхолд тулгуурлан аль чиглэлээр төрөлжүүлэхээ орон нутаг өөрөө сонгож, тухайн чиглэлээр төрөлжсөн сургалтыг зохион байгуулах бодлого баримтална. Төрөлжсөн ахлах сургуулиудыг хөдөлмөрийн зах зээлийн эрэлт хэрэгцээ, мэргэжлийн чиглэлтэй уялдуулан хөгжүүлж, сурагчдад ирээдүйн мэргэжлээ сонгох, түүндээ эртнээс бэлтгэнэ. Эдгээр ажлыг төр, хувийн хэвшлийн түншлэл, төрийн хөрөнгө оруулалт зэрэг олон боломжийг ашиглан үе шаттай хэрэгжүүлэхээр төлөвлөжээ.
Сэтгэгдэл бичих