Эрүүл мэндийн сайд Э.Батшугар Дэлхийн банк группын Монгол Улсыг хариуцсан менежер хатагтай Виктория Делмоныг хүлээн авч уулзлаа.
Уулзалтын үеэр Монгол Улсын эрүүл мэндийн салбарт Дэлхийн банктай хэрэгжүүлсэн хамтын ажиллагааны үр дүн, цаашид хамтран хэрэгжүүлэх боломжтой төсөл, хөтөлбөрийн талаар санал солилцов. Өмнө нь хэрэгжүүлсэн “Цахим эрүүл мэнд” төсөл, Ковид-19 цар тахлын үеийн эрүүл мэндийн салбарын бэлэн байдлыг хангах чиглэлээр хэрэгжүүлсэн төслийн үр дүнг онцлов.
Цаашдын хамтын ажиллагааны хүрээнд эрүүл мэндийн салбарын цахим шилжилтийг эрчимжүүлэх, мэдээллийн системийн уялдаа холбоо, мэдээлэл харилцан солилцох боломжийг сайжруулах, хүний нөөцийн чадавхыг бэхжүүлэх чиглэлд анхаарч ажиллах юм. Мөн өвчнөөс урьдчилан сэргийлэх, эрт илрүүлгийг өргөжүүлэх, эрүүл мэндийн санхүүжилтийн тогтолцоог боловсронгуй болгох, цар тахал болон нийтийн эрүүл мэндийн онцгой байдлын үеийн бэлэн байдлыг бэхжүүлэх чиглэлээр хамтын ажиллагааг өргөжүүлэх боломжийн талаар хэлэлцэв.
Эрүүл мэндийн сайд Э.Батшугар “Бид өмнөх хамтын ажиллагааны бий болгосон суурь, сургамжид тулгуурлан эрүүл мэндийн салбарын цахим шилжилтийг дараагийн шатанд хүргэхийг зорьж байна. Ялангуяа эрүүл мэндийн байгууллагын мэдээллийн системийн уялдаа, мэдээлэл харилцан солилцоо, хүний нөөцийн чадавхыг бэхжүүлэхэд хамтын ажиллагаагаа чиглүүлэх нь чухал. Эцсийн үр дүн нь иргэн бүрд илүү хурдан, чанартай, хүртээмжтэй эрүүл мэндийн тусламж үйлчилгээг хүргэхэд чиглэх ёстой” хэмээн онцоллоо.
Сэтгэгдэл бичих