Аялал жуулчлалын оргил улирлын оргил үе болон НҮБ-ын Цөлжилттэй тэмцэх конвенцын Талуудын 17 дугаар бага хурал (COP17)-ын өмнө хомсдоод буй шатахууны нийлүүлэлтийг хэвийн болгоход Засгийн газар шуурхай арга хэмжээ авах шаардлагатайг Аялал Жуулчлалын Мэргэжлийн Холбооноос илэрхийлж, хэвлэлийн хурал хийлээ.
Энэ сард болох “COP17” бага хурлын үеэр олон улсын төлөөлөгч зочид нэмэгдэх тул агаарын болон авто тээврийн тасралтгүй ажиллагааг хангахын тулд ССАЖЗЯ, ЗТЯ, АҮЭБЯ, Аялал жуулчлалын мэргэжлийн холбоо, шатахуун импортлогч компани, салбарын төлөөлөл шуурхай уулзаж, шатахууны хангамж, тээврийн хэвийн үйл ажиллагааг хангах шийдвэр яаралтай гаргахыг хүсэв. Учир нь шатахууны хангамж тасалдах нь аялал жуулчлалын салбар төдийгүй улсын нэр хүнд, олон улсын үйл ажиллагааны зохион байгуулалтад эрсдэл учруулж болзошгүйг тодотголоо.
Монгол Улс энэ оны долоодугаар сарын 31-ний байдлаар 568,989 гадаадын жуулчин хүлээн авсан нь өнгөрсөн оны мөн үеийнхээс 18.9 хувиар нэмэгджээ. Зөвхөн өнгөрсөн сард гэхэд 150,257 жуулчин хүлээн авсан нь сүүлийн дөрвөн жилийн хамгийн дээд үзүүлэлт боллоо. Гэвч шатахууны хомсдол үүссэнээр олон улс, орон нутгийн нислэг, авто тээвэр, аяллын хөтөлбөр, жуулчны бааз, зочлох үйлчилгээний байгууллагын хэвийн ажиллагаа алдагдаж, жуулчдын аюулгүй байдал, үйлчилгээний чанарт нөлөөлж байгааг аялал жуулчлалын салбарын холбоодын төлөөлөл онцолж байлаа.
Сэтгэгдэл бичих