Боловсролын салбарын 2027 оны төсвийн төслийн талаар олон нийтийн хэлэлцүүлэг болж, иргэд, төрийн бус байгууллага, багш нарын үйлдвэрчний эвлэл, багш, эцэг эхийн төлөөлөл оролцон санал, байр сууриа илэрхийллээ.
Хэлэлцүүлгийн үеэр оролцогчид хувьсах зардлын санхүүжилт, сурагчдын үдийн хоолны хүртээмж, сургуулийн сэтгэл зүйчийн үйлчилгээ, хөгжлийн ялгаатай хүүхдийн тэгш суралцах боломжийг хангах санхүүжилтийг ирэх оны төсөвт тусгах шаардлагатай байгааг онцолсон юм.
Мөн иргэд энэ сарын 10-ны өдрийг дуустал www.ebudget.edu.mn цахим хуудсаар дамжуулан боловсролын салбарын 2027 оны төсвийн төсөөлөлтэй танилцаж, төсөвт тусгах шаардлагатай санал, хүсэлтээ цахимаар илгээх боломжтой юм. Боловсролын салбарын сүүлийн жилүүдийн төсвийн үзүүлэлтийг авч үзвэл, 2022-2026 онд боловсролын салбарын төсөв дотоодын нийт бүтээгдэхүүний 4.0-5.2 хувь, нэгдсэн төсвийн нийт зарлагын 12.6-16.4 хувийг эзэлжээ. Харин 2026 оны баталсан төсөв нь нэгдсэн төсвийн нийт зарлагын 16.4 хувьтай тэнцэх хэмжээнд баталжээ. Урьдчилсан тооцооллоор 2027 онд боловсролын салбарын төсөв дотоодын нийт бүтээгдэхүүний 7.61 хувьд хүрч, 2026 оны түвшнээс 2.94 нэгж хувиар өсөхөөр тооцоолжээ.
Энэхүү хэлэлцүүлэг нь боловсролын салбарын төсвийг боловсруулах, батлах үйл явцад олон нийтийн оролцоог нэмэгдүүлэх, төсвийн төслийг бодит хэрэгцээ, шаардлагад нийцүүлэн боловсронгуй болгох зорилготой юм.
Сэтгэгдэл бичих