Боловсролын сайдын ээлжит шуурхай хуралдаан болж, нийслэлийн ерөнхий боловсролын сургуулийн хүртээмжийг нэмэгдүүлэх ажлын явц, төрөлжсөн ахлах сургуулийн бэлтгэл ажлын талаар холбогдох албаныхан танилцууллаа.
Хуралдааны үеэр нийслэлийн хэмжээнд төрөлжсөн ахлах сургуулиудыг зохион байгуулалтын хувьд бэлэн болгосныг мэдээлэв.
2026-2027 оны хичээлийн жилд эхний ээлжид 164 бүлэгт 5612 сурагчийг төрөлжсөн ахлах сургуульд суралцуулахаар бэлтгэл ажлыг бүрэн хангажээ.
Мөн нийслэлд хотхоны бага сургууль болон төрөлжсөн ахлах сургуулийн тогтолцоо хэрэгжүүлж эхэлснээр нэг ангид 46-гаас дээш хүүхэдтэй 1089 бүлгээс 971 бүлгийн ачааллыг нимгэлэх боломжтой ба үлдсэн 118 бүлгийн асуудлыг үе шаттай шийдвэрлэх нөхцөл бүрдэх юм.
Эхний шатанд төрөлжсөн ахлах сургуульд нийт 14,848 сурагчийг хамруулахаар төлөвлөжээ. Цаашид нэмэлтээр 7300 хүүхдийг хамруулах хүчин чадалтай байгааг танилцуулсан юм. Мөн шуурхай хуралдааны үеэр Боловсролын сайд Л.Энх-Амгалан хөдөө орон нутагт ашиглахгүй байгаа ариун цэврийн байгууламжийг хүүхдүүд тогтмол ашиглах боломжтой болгоход анхан шатны нэгж дээр анхаарах хэрэгтэйг онцлов.
Сэтгэгдэл бичих