Дэлхийн байгаль хамгаалагчдын өдөр өнөөдөр тохиож байна.
Дэлхийн Байгаль хамгаалагчдын өдрийг энэ жил "Байгаль хамгаалагчид: Өөрчлөгдөж буй дэлхийн манаачид" уриан дор тэмдэглэж байна. Байгаль хамгаалагчид бол байгалийн өв, биологийн олон янз байдал, тусгай хамгаалалттай газар нутаг, соёлын үнэт өвийг хамгаалах үйлсийн тэргүүн эгнээнд үүрэг гүйцэтгэн, алс бүс нутагт, цаг агаарын хатуу ширүүн нөхцөлд ч эх дэлхийнхээ төлөө эр зориг, үнэнч сэтгэлээр зүтгэдэг хүмүүс.
Уур амьсгалын өөрчлөлт, цөлжилт, биологийн олон янз байдлын алдагдал зэрэг дэлхий нийтийн өмнө тулгамдсан сорилтын энэ цаг үед байгаль хамгаалагчдын үүрэг, оролцоо урьдынхаас илүү чухал болсоор байгааг БОУАӨЯ тодотголоо. Манай улсын тусгай хамгаалалттай газрын сүлжээ, орон нутгийн байгаль орчин, аялал жуулчлалын газрын харьяанд 1000 гаруй байгаль хамгаалагч, байгаль орчны салбарын 30 орчим хуулийг хэрэгжүүлэхэд анхаардаг юм.
Дэлхийн байгаль хамгаалагчдын өдрийг Олон Улсын Байгаль Хамгаалагчдын Холбооны санаачилгаар 2007 оноос эхлэн байгаль хамгаалагчдыг алдаршуулах, албан үүргээ гүйцэтгэж яваад амиа алдсан байгаль хамгаалагчдад хүндэтгэл илэрхийлэх зорилготой тэмдэглэж иржээ.
Сэтгэгдэл бичих