Хиймэл оюун ухааны салбарт өрсөлдөх чадварыг сайжруулах, технологийн бие даасан байдлыг бэхжүүлэх зорилгоор Европ тивд хиймэл оюуны 7 хүртэлх тооны гигафабрик байгуулахаар Европын Холбоо шийдвэрлэсэн бөгөөд саяхан тендер зарлажээ.
Хиймэл оюуны гигафабрик (AI Gigafactory) гэдэг нь хиймэл оюуны загварыг сургах, их хэмжээний өгөгдөл боловсруулах асар их хүчин чадалтай супер компьютерийн төв юм.
Энэхүү төслийг ЕХ-ны сангууд ба улс орнуудын нөөцөөс гаргах 10 тэрбум евро, ЕХ-ны гишүүн орнуудын хувийн хэвшлийн компаниуд, хувь хүмүүсийн 20 тэрбум еврогийн хөрөнгө оруулалтаар хэрэгжүүлэх ажээ.
Төсөл хэрэгжсэнээр хиймэл оюуны салбар дахь Европын тооцоолон бодох хүчин чадал эрс өсөх юм. Стартапууд, өсөн дэвжиж буй компаниуд, жижиг дунд үйлдвэрүүд, аж үйлдвэрийн салбарынхан, эрдэм шинжилгээний болон төрийн байгууллагууд хиймэл оюуны шилдэг загваруудыг сургаж, боловсруулахад шаардлагатай энэхүү дэд бүтцийг ашиглах боломжтой. Европ даяар бий болох хиймэл оюуны 19 фабрик бүхий сүлжээтэй нэгдсэнээр энэхүү дэд бүтэц нь тус бүс нутгийн технологийн манлайлал, тогтвортой, стратегийн бие даасан байдлыг бэхжүүлнэ.
Үүний сацуу ЕХ-ны дүрэм журам, үнэт зүйлсийн хүрээнд хиймэл оюуныг хөгжүүлэх хөгжүүлэх боломжийг олгох бөгөөд эдгээр фабрикт боловсруулах технологиуд нь өгөгдлийг хамгаалах, аюулгүй байдлыг хангах, ёс зүйн тал дээр ЕХ-ны стандартад нийцэх ёстой.
Европын Холбоо нь хиймэл оюуны салбарт АНУ ба Хятадаас хамааралт байдлыг багасгахыг эрмэлзэж байгаа юм.
Сэтгэгдэл бичих