Өнөөдрийн байдлаар COP17 бага хуралд оролцох төлөөлөгчдөөс нийт 1,582 хүн цахим визийн хүсэлтээ ирүүлээд байна. Үүнээс 1,223 хүний визийн зөвшөөрлийг олгосон бол үлдсэн хүсэлт нь нэмэлт мэдээлэл шаардлагатай, эсвэл бүрдүүлсэн материал дутуу зэрэг шалтгаанаар шийдвэрлэх шатандаа байна.
Монгол Улс өнөөдрийн байдлаар 84 улсын иргэдийг ямар нэг хэлбэрээр визгүй зорчуулах нөхцөлийг бүрдүүлээд байгаа юм. НҮБ-ын Цөлжилттэй тэмцэх тухай конвенц нь Монгол Улсыг оролцуулан нийт 197 талтай. Иймээс Монгол Улсаас бусад 196 талын төлөөлөгчид COP17 бага хуралд хүрэлцэн ирэх бөгөөд визгүй зорчих эрхтэй улсын төлөөлөгчид шууд нэвтрэх боломжтой. Харин бусад улсын төлөөлөгчид визийн журмын дагуу хүсэлтээ гаргаж, Монгол Улсад албан ёсоор нэвтрэх юм.
Хурлыг цэнхэр, ногоон гэсэн гэсэн 2 хоёр бүсэд зохион байгуулна. Цэнхэр бүсэд Конвенцын талуудын хурал, үйл ажиллагааг зохион байгуулах бол ногоон бүсэд дотоодын үйл ажиллагааг зохион байгуулах ба иргэд E-mongolia.mn бүртгэлээрээ бүртгүүлж нэвтрэх боломжтой юм.
COP17-ын бэлтгэл ажлын хүрээнд оролцогчдын байр, зочид буудлын зохион байгуулалт нь хамгийн чухал чиглэлийн нэг болоод байна. Энэ оны хавраас эхлэн Үндэсний хороо Монголын зочид буудлын холбоо болон холбогдох төрийн бус байгууллагуудтай хамтран ажиллаж, COP17-д оролцогчдод зориулан нийт 1,432 өрөөг урьдчилан нөөцөлжээ.
Өнөөдрийн байдлаар эдгээр өрөөнөөс 803 нь захиалсан бөгөөд энэ нь нийт нөөцийн 56 хувийг эзэлж байна. Бага хурал эхлэх хугацаа ойртохын хэрээр оролцогчдын тоо нэмэгдэх төлөвтэй байгаа тул үлдсэн өрөөнүүд ч бүрэн захиалагдана гэж Үндэсний хорооны Ажлын албанаас мэдээлэв.
Оролцогчид байрлах зочид буудлаа өөрсдийн сонголтоор захиалах боломжтой аж. COP17-ын албан ёсны цахим хуудсанд хамрагдсан бүх зочид буудлын байршил, үйлчилгээ, өрөөний төрөл, үнийн мэдээллийг нээлттэй байршуулсан бөгөөд төлөөлөгчид өөрийн хэрэгцээ, төсөв, сонголтдоо нийцүүлэн буудлаа сонгож, төлбөрөө шууд төлөх зохион байгуулалттай ажиллаж байна.
Сэтгэгдэл бичих