Элсэлтийн шалгалт зургадугаар сарын 25-28-ны өдрүүдэд орон даяар болж өндөрлөлөө. Шалгалтын дараах дүн, статистик мэдээллийг Боловсролын үнэлгээний төвөөс танилцуулсан бөгөөд энэ жил 49 мянга гаруй шалгуулагч ЭЕШ-д бүртгүүлжээ. Албаныхны мэдээлснээр шалгалт зөрчилгүй, хэвийн зохион байгуулагдсан байна.
МАТЕМАТИК ХАМГИЙН ОЛОН ШАЛГУУЛАГЧТАЙ, НИЙГЭМ СУДЛАЛ ХАМГИЙН ӨНДӨР ИРЦТЭЙ БАЙВ
Энэ жил хамгийн олон хүүхэд математикийн шалгалт өгсөн байна. Тодруулбал, 33 мянга 116 шалгуулагч бүртгүүлснээс 94 хувь нь шалгалтад оролцжээ. Үүний дараа англи хэлний хичээлийг 31 мянга 619, нийгэм судлалыг 30 мянга 80 хүүхэд сонгосон байна. Харин шалгалтын ирцээр нийгэм судлалын хичээл 96 хувиар тэргүүлжээ. Англи хэл, химийн хичээлийн ирц 95 хувь, математик, биологи 94 хувь, физик 93 хувь байсан бол орос хэл 84 хувь, түүх 87 хувь, газар зүй 89 хувийн ирцтэй байв. Математикийн шалгалтын улсын дундаж оноо 508.2 байсан нь дундаж түвшнээс дээш үзүүлэлтэд тооцогдож байна.
МАТЕМАТИКИЙН ШАЛГАЛТААР 209 ШАЛГУУЛАГЧ 700-ААС ДЭЭШ ОНОО АВЧЭЭ
Математикийн шалгалтын дүнгээс харахад 33 мянга 114 шалгуулагчаас 874 нь 600-699 оноо, 209 нь 700-800 оноо авчээ. Өөрөөр хэлбэл, нийт шалгуулагчдын 2.6 хувь нь 600-аас дээш, 0.6 хувь нь 700-аас дээш оноо авсан байна. Энэ нь математикийн шалгалтын өндөр оноо авсан сурагчдын эзлэх хувь харьцангуй бага байгааг харуулж байна.
УЛААНБААТАР ХАМГИЙН ОЛОН ӨНДӨР ОНООТОЙ ШАЛГУУЛАГЧТАЙ БАЙВ
Аймаг, нийслэлээр нь авч үзвэл Улаанбаатар хотод хамгийн олон буюу 17 мянга 268 шалгуулагч математикийн шалгалт өгсөн байна. Үүнээс 485 нь 600-699, 114 нь 700-800 оноо авч, өндөр оноотой шалгуулагчдын тоогоор улсын хэмжээнд тэргүүлжээ.
ӨВӨРХАНГАЙ АЙМАГ ОРОН НУТГААС ТЭРГҮҮЛЖЭЭ
Орон нутгийн аймгуудаас Өвөрхангай аймаг хамгийн олон өндөр оноотой шалгуулагчтай байв. Тус аймагт 49 хүүхэд 600-699 оноо, 16 хүүхэд 700-800 оноо авчээ. Мөн Хөвсгөл аймагт 45 хүүхэд 600-699, 14 хүүхэд 700-800 оноо, Увс аймагт 39 хүүхэд 600-699, таван хүүхэд 700-800 оноо, Орхон аймагт 37 хүүхэд 600-699, зургаан хүүхэд 700-800 оноо авсан байна.
МОНГОЛЫН ТҮҮХ ХАМГИЙН ӨНДӨР, НИЙГМИЙН УХААН ХАМГИЙН БАГА ДУНДАЖТАЙ БАЙВ
Хичээл тус бүрийн улсын дундаж оноог харьцуулбал Монголын түүхийн шалгалтын дундаж 533.3 оноо гарч хамгийн өндөр үзүүлэлт болсон байна. Харин нийгмийн ухааны шалгалтын дундаж 483.0 оноотой гарч хамгийн бага дундажтай хичээл болжээ. Мөн орос хэлний дундаж 524.0, монгол хэл 512.9, газар зүй 510.0, математик 508.2, физик 501.2, хими 500.4, биологи 493.5, англи хэл 490.6 онооны дундажтай гарсан байна.
194 ШАЛГУУЛАГЧ 800 ОНОО АВЧЭЭ
Энэ жил 10 хичээлийн хэмжээнд нийт 194 шалгуулагч 800 оноо авсан байна. Өнгөрсөн онд 163 хүүхэд 800 оноо авч байсан бол энэ жил энэ тоо 31-ээр нэмэгджээ. Хичээлээр нь харвал нийгэм судлалаар 47, математикаар 43, англи хэлээр 36, монгол хэлээр 25 хүүхэд 800 оноо авсан байна. Мөн физикээр 14, биологи, химийн хичээлээр тус бүр 10, орос хэлээр тав, газар зүй болон түүхийн хичээлээр тус бүр хоёр шалгуулагч төгс оноо авчээ. Хэрэв шалгуулагчид авсан оноотойгоо санал нийлэхгүй бол Боловсролын үнэлгээний төвд хүсэлт гаргаж, өөрийн хариултын хуудастай тулгаж шалгуулах боломжтой юм.
ТУСГАЙ ХЭРЭГЦЭЭТ 56 ХҮҮХЭД ЭЛСЭЛТИЙН ШАЛГАЛТ ӨГЧЭЭ
Энэ жилийн ЭЕШ-ын нэг онцлог нь тусгай хэрэгцээт хүүхдүүдийн оролцоо нэмэгдсэн явдал байв. Таван жилийн өмнө 10 хүрэхгүй хүүхэд шалгалт өгдөг байсан бол энэ жил улсын хэмжээнд 56 хүүхэд элсэлтийн шалгалтад хамрагджээ. Тэдэнд зориулж тусгай шалгалтын орчин бүрдүүлж, шаардлагатай хүүхдүүдэд шалгалтын хугацааг сунгах, компьютер ашиглуулах зэрэг зохицуулалт хийсэн байна.
ГАР УТАС АВЧ ОРСОН 22 ШАЛГУУЛАГЧИЙН ДҮНГ ХҮЧИНГҮЙ БОЛГОЖЭЭ
Шалгалтын үеэр журмын зөрчил ч гарсан байна. Биологи болон математикийн шалгалтын үеэр нийт 22 шалгуулагч гар утас авч орсон нь илэрчээ. Дүрмийн дагуу шалгалтын байранд гар утас авч орохыг хориглодог бөгөөд дээрх шалгуулагчдын дүнг хүчингүй болгосон байна.
ИРЭХ ЖИЛҮҮДЭД БОСГО ОНОО НЭМЭГДЭЖ, SAT-ТАЙ УЯЛДУУЛНА
Боловсролын яам ирэх жилээс их, дээд сургуульд элсэх босго оноог 490 болгож, цаашид 500 хүртэл нэмэгдүүлэхээр төлөвлөжээ. Мөн Элсэлтийн ерөнхий шалгалтыг жилд хоёр удаа зохион байгуулах бодлого үргэлжлэх бөгөөд арваннэгдүгээр сард монгол хэлний шалгалт, арванхоёрдугаар сард ЭЕШ-ыг дахин авах юм. Түүнчлэн олон улсын SAT шалгалтыг элсэлтийн шалгалттай уялдуулах ажлыг эхлүүлэхээр болсон байна. Элсэлтийн ерөнхий шалгалтын дүнгээс харахад 800 оноо авсан хүүхдүүдийн тоо өмнөх оноос өсөж, шалгалтын ирц өндөр байлаа. Нөгөө талаар тусгай хэрэгцээт хүүхдүүдийн оролцоо нэмэгдэж, элсэлтийн тогтолцоонд шинэ өөрчлөлтүүд хийхээр болсон нь энэ жилийн ЭЕШ-ын онцлох үйл явдлуудын нэг байв.
1. Өвөрхангай – 524.4
2. Сүхбаатар – 524.0
3. Увс – 520.5
4. Говьсүмбэр – 515.1
5. Дорноговь – 513.0
6. Дундговь – 511.5
7. Дархан-Уул – 509.3
8. Завхан – 508.8
9. Говь-Алтай – 506.6
10. Баянхонгор – 506.5
11. Орхон – 503.4
12. Төв – 502.5
13. Ховд – 500.9
14. Дорнод – 496.0
15. Хэнтий – 495.2
16. Сэлэнгэ – 495.0
17. Хөвсгөл – 494.0
18. Архангай – 490.3
19. Өмнөговь – 488.5
20. Булган – 485.5
21. Баян-Өлгий – 473.6
Улсын дундаж: 503.1
Сэтгэгдэл бичих