Технологийн салбарын тэрбумтан Илон Маск SpaceX компанийнхаа хувьцааг олон нийтэд анх санал болгосны дараа дэлхийн анхны их наядтан болсон.
Гэсэн ч хоёр долоо хоног хүрэхгүй хугацааны дараа энэ статусаа алдлаа.
Тодруулбал Bloomberg-ийн тэрбумтнуудын индексийн мэдээлснээр түүний хөрөнгө мягмар гарагт 957 тэрбум ам.доллар болж буурсан нь 14 хоногийн өмнөх 1.11 их наяд ам.долларын үнэлгээнээс эрс багассан үзүүлэлт юм.
Энэ бууралтад SpaceX болон Tesla компанийн хувьцааны ханш огцом унасан нь голлон нөлөөлжээ.
Гэсэн ч Маск дэлхийн хамгийн баян хүн хэвээр байгаа бөгөөд түүний хөрөнгө хамгийн ойрын өрсөлдөгчдийнхөөс нь хол давсан хэвээр байна.
Маск зургаадугаар сарын 12-нд SpaceX компанийнхаа хувьцааг Nasdaq бирж дээр олон нийтэд санал болгосон. IPO-ийн үнэ нэгж хувьцаа нь 135 ам.доллар байсан бол арилжаа эхлэхэд 150 ам.долларт хүрчээ.
Үүний үр дүнд SpaceX-ийн үнэлгээ 1.77 их наяд ам.доллар давсан байна. Компанийн 42 хувийг эзэмшдэг Маскийн хөрөнгө тэр даруй 1 их наяд ам.долларыг давсан юм.
Дөрөв хоногийн дараа гэхэд хөрөнгө оруулагчдын хэт өндөр хүлээлтээс шалтгаалан SpaceX-ийн хувьцаа 225.64 ам.долларт хүрч, Маскийн нийт хөрөнгө 1.32 их наяд ам.долларын оргил хэмжээнд хүрчээ.
Гэвч энэ нь удаан үргэлжилсэнгүй.
Хөрөнгө оруулалтын зардал, хиймэл оюуны дэд бүтцийн өндөр өртөг, зээлийн хүү буурахгүй байгаа зэрэг хүчин зүйлээс шалтгаалан технологийн салбар бүхэлдээ уналтад оржээ. Үүний улмаас Nvidia, Intel, AMD зэрэг компаниудын хувьцаа мөн буурсан аж.
Маскийн хөрөнгийн дийлэнх нь хоёр компанитай холбоотой байдаг.
Түүний нийт хөрөнгийн бараг 80 хувь нь SpaceX, үлдсэн томоохон хэсэг нь Tesla компанийн хувьцаанаас бүрддэг. Иймээс эдгээр компанийн ханшийн савлагаа Маскийн хөрөнгөнд шууд нөлөөлдөг.
Санхүүгийн шинжээчид өндөр үнэлгээтэй компаниудын IPO-ийн дараах хэлбэлзэл хэвийн үзэгдэл гэж үзэж байгаа ч энэ удаагийн савлагаа нь хөрөнгө оруулагчдын хэт өндөр хүлээлт болон бодит үнэлгээний зөрчлийг харуулж байна гэжээ.
Гэхдээ SpaceX-ийн хувьцаа 6 орчим хувиар өсөхөд л Маск дахин их наядтан болох боломжтой юм байна.
Эх сурвалж: ВВС
Сэтгэгдэл бичих