Сүүлийн жилүүдэд Энэтхэг улс гоо заслын анагаах ухаан болон гоо сайхны мэс заслын хамгийн эрэлттэй чиглэлүүдийн нэг болоод байгаа тухай Олон улсын гоо сайхны мэс заслын нийгэмлэг (ISAPS) мэдээлжээ.
Тус нийгэмлэгийн мэдээллээс үзвэл, тус улс гоо сайхны үйлчилгээ, мэс засал хийлгэхээр гадаадаас ирж буй үйлчлүүлэгчдийн тоогоор эхний аравт бичигдсэн байна.
Энэтхэг ийнхүү үйлчлүүлэгчдийг татах болсон шалтгаан нь үйлчилгээний өртөг харьцангуй хямд, эмнэлгийн тусламж үйлчилгээг өндөр түвшинд үзүүлдгээс гадна, олон улсын туршлагатай, англи хэлтэй мэргэжилтнүүдтэй, мөн эрүүл мэндийн аялал жуулчлалын дэд бүтэц сайн хөгжсөнтэй холбоотой байна. Өдгөө тус улсын гоо сайхны салбарын зах зээл 4 тэрбум гаруй ам.доллароор үнэлэгдэж байгаа бөгөөд ирэх жилүүдэд энэ хэмжээ дахин хэд дахин өсөх төлөвтэй байна.
Энэтхэгийн эмнэлгүүдээр АНУ, Европ, Африк болон Ойрх Дорнодын орнуудын иргэд голчлон үйлчлүүлж байгаа ажээ. Тус улсад мэс заслын аргаар хийгддэг гоо сайхны өөрчлөлтүүдээс гадна, мэс заслын бус үйлчилгээ болох ботокс, лазер эмчилгээ, филлер тарилгууд онцгой эрэлттэй байна.
Гэвч мэргэжилтнүүд төгс гадаад төрх рүү тэмүүлэхийн сөрөг талыг ч мөн анхааруулж байна. Эмч нарын ажигласнаар, дисморфофоби буюу бие галбир, зүс царайгаа голох сэтгэцийн эмгэгийн тохиолдол улам бүр нэмэгдэх болжээ. Тиймээс хариуцлагатай эмнэлгүүд өвчтөний зөвхөн бие махбодын байдлыг харахаас гадна тухайн үйлчилгээг хийлгэхэд сэтгэл зүйн хувьд хэр бэлэн байгааг нь үнэлэхийг хичээдэг болсон байна.
Гоо заслын анагаах ухааны нэр хүнд өсөж байгаа хэдий ч олон үйлчлүүлэгчид мэс засалчдад хандахдаа төгс болох гэж биш, харин өөртөө илүү тухтай, өөртөө итгэлтэй болохын тулд ирдэг гэдгээ онцолдог. Мэргэжилтнүүдийн үзэж байгаагаар, яг энэ шалтгаан нь Энэтхэгийн хурдацтай хөгжиж буй гоо сайхны зах зээлийн гол хөдөлгөгч хүч хэвээр байна.
Сэтгэгдэл бичих