Хүн төрөлхтөн хиймэл оюунаар тооцоолж, технологийн эрин зуунд хөгжлийн хэмжих нэгжээ тодорхойлж байгаа энэ цаг үед дэлхийн математикийн шинжлэх ухаанд шинэ онол, аргуудыг Монгол эрдэмтэд зохиосон нь анхаарал татаж байна.
Тухайлбал, Монгол Улсын Төрийн шагналт, академич, Математикийн шинжлэх ухааны доктор, профессор Т.Жанлав, академич, Математикийн шинжлэх ухааны доктор О.Чулуунбаатар, МУБИС-ийн профессор, Математикийн шинжлэх ухааны доктор, дэд профессор Р.Мижиддорж, ШУТИС-ийн профессор, Математикийн ухааны доктор, профессор В.Өлзийбаяр нарын эрдэмтдийн гаргасан “Орчин цагийн тооцон бодох математикийн шинэ онол, чиглэлүүд, хэрэглээ” сэдэвт бүтээлийг Монгол Улсын төрийн шагналд нэр дэвшүүлжээ.
“New Developments of Newton–Type Iterations for Solving Nonlinear Problems”, “High-order finite difference and finite-element methods for solving some partial differential equations” бүтээл нь байгаль орчин, цаг уурын өөрчлөлт, нийгэм эдийн засаг, хиймэл оюун ухаан, эрүүл мэнд зэрэг их өгөгдөлд суурилсан бүх салбарт хэрэглэх боломжтойг тодорхой жишээн дээр туршиж баталгаажуулсан байна.
Тус бүтээл дэлхийн шилдэг “SPRINGER NATURE” хэвлэлийн газарт хэвлэгдэж “ELSEVIER SCOPUS” индекс хийгдсэн бөгөөд монгол хүний оюуны чадамжийг харуулсан шинэ нээлт болсноороо онцлогтой.
Монголын эрдэмтдийн шинэ бүтээлүүд нь олон улсын шилдэг эрдэм шинжилгээний байгууллагууд болоод их сургуулиудын 170 гаруй номын санд байршиж эрдэмтэн, судлаачдын хүртээл болоод буй аж.
Сэтгэгдэл бичих