Хиймэл оюунд суурилсан, өндөр нарийвчлалтай, 512 зүслэгт компьютер томограф төхөөрөмжийг Улсын гуравдугаар төв эмнэлэгт суурилуулж, оношилгоонд ашиглаж эхэллээ.
Энэ төхөөрөмжийг суурилуулснаар иргэд эх орондоо өндөр түвшинд оношлуулах боломжтой болж буйг тус эмнэлгийн ерөнхий захирал Ц.Төмөр-Очир дурдаад, “Манай улсад ийм өндөр хүчин чадалтай аппаратыг анх удаа суурилууллаа. Өмнө нь 64 зүслэгт аппаратаар зүрхний титэм судасны шинжилгээ хийхэд 2-3 цаг зарцуулж байсан бол энэ төхөөрөмжөөр хэдхэн секунд зарцуулна. Гадаад улсыг зорин оношилгоо хийлгэх шаардлага ч багасгана” гэв.
Шинэ төхөөрөмж нь зүрхний дүрслэлийг дунджаар 0.259, бүтэн биеийн судасны шинжилгээг 5 секундэд хийх хүчин чадалтай. Хиймэл оюунд суурилсан дэвшилтэт алгоритмууд нь хөдөлгөөн, амьсгалын улмаас үүсдэг дүрсний алдагдлыг багасгаж, судасны бүтэц, эмгэг өөрчлөлтийг илүү тод, нарийвчлал сайтай дүрсэлнэ.
Тус эмнэлгийн Дүрс оношилгооны лавлагаа төвийн эмч, Аанагаах ухааны доктор, дэд профессор Д.Дэлгэрцэцэг “Өмнө нь зүрхний компьютер томографын дүрслэлийг боловсруулахад хоёр цаг орчим зарцуулж байсныг одоо 10 минутын дотор гаргана. Шинжилгээг 2-7 секундэд хийдэг. Өмнөх төхөөрөмжөөр өдөрт дунджаар 5 хүнд шинжилгээ хийж байсан бол одоо хамгийн багадаа 20, сард 500 гаруй хүнд үйлчлэх боломжтой боллоо” гэж ярив.
Тус төхөөрөмжөөр эмнэлэгт хэвтэн эмчлүүлж буй, хүнд болон онош тодорхойгүй өвчтөнүүдэд шинжилгээг үнэ төлбөргүй хийхээр төлөвлөжээ. Neusoft NeuViz Epoch 512 зүслэгт компьютер томограф нь АНУ, Европын холбооны орнууд, Сингапур, Малайз, Япон зэрэг хөгжингүй улсад ашигладаг, дүрс оношилгооны хамгийн их нягтаршилтай технологийн нэг бөгөөд олон улсын зах зээл дэх өртөг нь 2 сая орчим ам.доллар ажээ. Дэвшилтэт технологийг нэвтрүүлснээр зүрх судас, тархи мэдрэл, уушги болон бусад эрхтэн тогтолцооны эмгэгийг богино хугацаанд нарийвчлалтай оношилж, эрүүл мэндийн тусламж үйлчилгээний чанар, хүртээмжийг сайжруулж байгаа юм.
Сэтгэгдэл бичих