Баруун аймгуудад өнгөрсөн сарын 25-ны өдрөөс эхлэн малын гоц халдварт шүлхий өвчний САТ-1 хэвшил бүртгэгдэж, нөхцөл байдал хүндэрсэнтэй холбогдуулан зарим бүс нутагт хатуу хөл хорио тогтоогоод байна. Салбарын сайд Ц.Идэрбат одоогоор Монгол Улсын хэмжээнд уг хэвшлийн эсрэг вакцин байхгүй байгаа учир ОХУ-аас татаж авахаар болсон гэж мэдэгдсэн. Үүссэн нөхцөл байдалтай холбогдуулан Ховд аймгийн Онцгой комиссын дэргэдэх Шуурхай штабын орлогч дарга Д.Батцэнгэл мэдээлэл өглөө.
Тэрбээр, "аймгийн хэмжээнд халдварын тохиолдол нэмэгдэж, өнөөдрийн байдлаар 62 өрхийн 10 голомтод 603 мал өвчлөөд байна. Үүнээс 466 малыг устгалд оруулаад байгаа бөгөөд өвчин гарсан Булган, Үеэнч сумдад хариу арга хэмжээнүүдийг авч ажиллаж байгаа. Гэвч Булган суманд өвчлөл нэмэгдэж, нөхцөл байдал хүндхэн байгаа тул аймгийн Шуурхай штаб холбогдох удирдлагуудыг оролцуулан хуралдаж, дараах шийдвэрүүдийг гаргасан.
Тодруулбал, сумдад тулгамдаж байгаа санхүүгийн асуудлыг шуурхай шийдвэрлэж, Булган суманд 10 сая төгрөг, Үеэнч суманд 8 сая төгрөг, хээрийн штаб байгуулж байгаа газруудад тус бүр гурван сая төгрөгийг хуваарилсан.
Мөн шүлхий өвчнөөр өвчилсөн малыг устгах ажлыг эрчимжүүлж, Булган суманд удаашралтай байгаа мал устгалын ажлыг түргэсгэх, тээврийн штаб болон сум хариуцсан комиссын дарга нарын үйл ажиллагааг идэвхжүүлэх үүрэг өгсөн. Халдварын тархалтаас сэргийлэх үүднээс Мянгат сумаас Цоохор нуур руу хийж байсан хүдэр тээвэрлэлтийн ажлыг бүрмөсөн зогсоохоор шийдвэрлэсэн. Түүнчлэн хяналт шалгалтыг чангатгах зорилгоор Чоно харайхын гол болон Мянгатын гүүрүүдэд пост гаргаж ажиллуулах асуудлыг бүрэн шийдвэрлэж, холбогдох аймгуудын Засаг дарга нарт үүрэг чиглэл хүргүүлсэн. Мөн хилийн боомтуудаар нэвтэрч буй тохиолдолд ариутгал, халдваргүйтгэлийг сайжруулахаар ажиллаж байна.
Хээрийн штаб болон голомт дээр ажиллах малын эмч нарыг томилсон хэдий ч орон нутагт малын эмч дутагдалтай байгаа тул эмч нарын хүчийг нэмэгдүүлэх асуудлыг хэлэлцэж байгаа. Одоогоор бүх шатанд эрсдэлийн үнэлгээ хийж, халдварын голомтыг хумих тал дээр онцгой анхаарч байгаа ч зарим сумдад зөрчил дутагдал гарч байна. Тухайлбал, Дуут суманд малчид зөвшөөрөлгүйгээр дур мэдэн нүүдэл хийсэн хариуцлагагүй үйлдэлд холбогдох хууль тогтоомжийн дагуу хариуцлага тооцохоор болоод байна
Сэтгэгдэл бичих