Узбекистаны Ерөнхийлөгч Шавкат Мирзиёев, Оросын төрийн тэргүүн Владимир Путин нар Узбекистаны анхны хос хүчин чадал бүхий атомын цахилгаан станцын (АЦС) эрчим хүчний эхний блокийн барилгын ажлыг эхлүүлжээ.
Уг ёслолын ажиллагааг цахимаар зохион байгуулсан бөгөөд Олон улсын атомын эрчим хүчний агентлагийн ерөнхий захирал Рафаэль Гросси мөн оролцсон байна.
Узбекистаны Ерөнхийлөгчийн хэвлэлийн албанаас мэдээлснээр, энэхүү төсөл хэрэгжсэнээр тус улсад атомын эрчим хүч хэмээх шинэ салбар хөгжих суурь тавигдаж байна. Барилгын ажлыг эхлүүлэх бэлгэдлийн товчлуурыг дарах эрхийг орон нутгийн оюутнуудад олгожээ. Ингэснээр ирээдүйд тус улсын цөмийн эрчим хүчний салбарыг хөгжүүлэх залуу мэргэжилтнүүдэд итгэл хүлээлгэж буйн илэрхийлэл болсон байна.
АЦС-ыг Жизак мужид барих бөгөөд нэг дор бага болон их чадлын АЦС-ыг хамтад нь барьж буй гэдгээрээ дэлхийд анхны төсөл юм.
Узбекистаны атомын энергийн "Узатом" агентлагийн дарга Азим Ахмедхажаевын мэдэгдсэнээр, тус АЦС-ыг барих үндсэн өртөг нь 9.5 тэрбум ам.доллар болох бөгөөд ОХУ-ын тал барилгын ажилд зориулж Узбекистанд хөнгөлөлттэй экспортын зээл олгох ажээ.
АЦС-ыг ашиглалтад оруулсны дараа жил бүр дунджаар 17 тэрбум киловатт-цаг эрчим хүч үйлдвэрлэж, Узбекистаны нийт эрчим хүчний хэрэглээний 15 хүртэлх хувийг хангана.
Узбекистан улс "Росатом" компанитай бага чадлын АЦС-ын зураг төслийг боловсруулах, тоног төхөөрөмж нийлүүлэх, барилгын ажлын гүйцэтгэх гэрээг 2024 оны тавдугаар сард ОХУ-ын Ерөнхийлөгч В.Путин Ташкентад төрийн айлчлал хийх үеэр байгуулжээ.
Сэтгэгдэл бичих