Өнгөрсөн тавдугаар сард Испанид хэт халсны улмаас 101 хүн нас барсан нь тус улсад арав гаруй жилийн өмнөөс холбогдох статистик мэдээллийг хөтөлж эхэлснээс хойших хаврын сүүлчийн сард бүртгэгдсэн хамгийн өндөр үзүүлэлт болжээ.
Энэ оны тавдугаар сард амиа алдсан хүмүүсийн тоо өмнөх арван жилийн тавдугаар сарын дундаж үзүүлэлтээс 3.6 дахин өндөр гарсан байна. Албаныхан нас баралт нэмэгдсэнийг зун эхлэхээс өмнө хэт халсантай холбон тайлбарлаж байна.
Эдгээр үнэлгээг нас баралтын түвшнийг хянах "Momo" системийн өгөгдөлд үндэслэн гаргажээ. Уг систем нь орон даяар хоногт бүртгэгдэж буй нас баралтын тоог тогтмол хянаж, уг үзүүлэлтийг олон жилийн статистик мэдээлэлд тулгуурлан тооцоолсон нас баралтын түвшинтэй харьцуулан дүн шинжилгээ хийдэг байна.
Өмнө нь Испанийн Цаг уурын үндэсний агентлагаас (Aemet) тус улсын хэд хэдэн хотод агаарын температур дээд хэмжээнд хүрч халсныг мэдээлж байсан юм. Ялангуяа хойд бүс нутгуудад тавдугаар сард баймгүй ер бусын халуун байсан байна.
2025 оны зун Испанид хэт халсны улмаас 1060 хүн нас баржээ. Үүнтэй холбогдуулан тус улсын Ерөнхий сайд Педро Санчес улс даяарх олон нийтийн барилга байгууламжуудад түшиглэн уур амьсгалын өөрчлөлтөөс хорогдох байруудын үндэсний сүлжээг байгуулах ажлыг эхлүүлснээ зарлаж байв.
НҮБ-аас ойрын долоо хоногуудад "Эль-Ниньо" үзэгдэл үүсэх төлөвтэй байгааг өмнө нь анхааруулсан. Уур амьсгалын энэхүү үзэгдэл нь сүүлийн хэдэн арван жилийн хамгийн хүчтэй нөлөөлөлтэй үзэгдлүүдийн нэг болж, дэлхийн даяар хэт халалт, ган гачиг, үер ус, ой хээрийн түймэр зэрэг байгалийн гамшгийн эрсдэлийг нэмэгдүүлж, температурын шинэ дээд үзүүлэлтүүд тогтооход хүргэж болзошгүй байна.
Сэтгэгдэл бичих