Хоёр Солонгосыг нэгтгэх асуудал хариуцсан Өмнөд Солонгосын яамны сайд Чун Дон Ён өнөөдөр Улаанбаатарт айлчлан ирж буйг тус улсын засгийн газар мэдээлжээ.
Тэрбээр Пүрэв гарагт эхлэх 11 дэх удаагийн “Улаанбаатарын Яриа хэлэлцээ” арга хэмжээнд оролцож, үг хэлэх юм байна.
Хоёр өдөр үргэлжлэх энэ арга хэмжээний үеэр Чун сайд Солонгосын хойгт энх тайвнаар зэрэгцэн оршиж, хамтдаа цэцэглэн хөгжих талаар Сөүлийн эрх баригчдын бодлого, алсын харааг танилцуулах гэнэ.
2014 оноос эхэлсэн “Улаанбаатарын Яриа хэлэлцээ” нь Зүүн Хойд Азийн аюулгүй байдал, хамтын ажиллагааны асуудлаар
засгийн газрын албан тушаалтнууд, эрдэмтэн судлаачдын хэлэлцдэг олон улсын арга хэмжээ юм.
Айлчлалын үеэр Чун Дон Ён сайд Монгол Улсын ерөнхийлөгч Ухнаагийн Хүрэлсүхэд бараалхаж, гадаад хэргийн сайд Батмөнхийн Батцэцэг, соёл, спорт, аялал жуулчлал, залуучуудын сайд Жуковын Алдаржавхлан нартай уулзаж, хоёр талын харилцаа, хамтын ажиллагаа, Өмнөд Солонгосын энх тайванч бодлогыг Монголын талаас дэмжих арга замын талаар хэлэлцэх юм байна.
Хоёр Солонгосын аль алинтай нь дипломат харилцаатай Монгол улсыг Солонгосын хойгийн яриа хэлэлцээнд зуучлагчаар оролцох боломжтой гэж үздэг.
Умард Солонгос уг арга хэмжээнд 2018 оныг хүртэл оролцож байсан ч 2019 оноос хойш ганц ч удаа оролцоогүй юм байна.
Энэ удаагийн арга хэмжээнд оролцох эсэхээ тус улс одоогоор Монголын талд мэдэгдээгүй байгаа гэнэ. Улаанбаатарын Яриа хэлэлцээнд энэ удаа 25 улсын 250 орчим төлөөлөгч оролцох төлөвтэй байна.
Эх сурвалж: Yonhap News
Сэтгэгдэл бичих