Олон улсын шалгалтын үнэлгээ дүйцүүлэх хүсэлт авах хугацаа маргааш дуусна

 Боловсролын яамнаас олон улсад хүлээн зөвшөөрсөн шалгалтын үнэлгээг Монгол Улсын их, дээд сургуулийн элсэлтийн шалгалтын үнэлгээтэй дүйцүүлэх цахим хүсэлтийг хүлээн авч байгаа бөгөөд хүсэлт илгээх хугацаа маргааш дуусна.

 

БШУЯ-ны сайдын 2024 оны 2 дугаар сарын 16-ны өдрийн А/66 дугаар тушаалаар баталсан “Элсэлтийн шалгалт зохион байгуулах журам”, Боловсролын сайдын 2025 оны А/69 дүгээр тушаалын дагуу олон улсын шалгалтын үнэлгээг Элсэлтийн шалгалтын үнэлгээтэй дүйцүүлэн тооцдог.

Үүнд:

• Cambridge AS, A Level
• International Baccalaureate /IB/
• TOEFL /IBT/
• PTE
• IELTS
• SAT
• Гадаад улсын ахлах сургууль төгссөн болон олон улсад хүлээн зөвшөөрсөн бусад хөтөлбөрөөр суралцаж төгссөн суралцагчдын сурлагын дүн, оноо

Олон улсын шалгалтын үнэлгээг Элсэлтийн шалгалтын үнэлгээнд дүйцүүлэх хүсэлт гаргах оюутан, суралцагчид Боловсролын үнэлгээний төвийн цахим системд нэвтэрч хүсэлтээ илгээнэ. Мөн www.eec.mn цахим хуудасны “Элсэлтийн шалгалт” цэснээс “Олон улсын үнэлгээ дүйцүүлэх” хэсгийг сонгон, Элсэлтийн шалгалтын бүртгэлийн дугаар болон нууц үгээ ашиглан нэвтэрч шаардлагатай мэдээлэл, материалыг хавсаргана.

Бүрдүүлэх материал

• Үнэлгээ дүйцүүлэх тухай хүсэлт
• Төрсний гэрчилгээ эсвэл иргэний үнэмлэхийн хуулбар

• Үнэлгээ дүйцүүлэх хөтөлбөрийн сертификат буюу дүнгийн хуудсын хуулбар  

• Бүрэн дунд боловсролын гэрчилгээний хуулбар эсвэл гадаадад бүрэн дунд боловсрол эзэмшсэнийг гэрчлэх дүйцүүлсэн баримт /өмнөх оны төгсөгчдийн хувьд/
• Сурч буй сургуулийн тодорхойлолт /12 дугаар ангийн сурагчдын хувьд/

Боловсролын үнэлгээний төв хүсэлтийг хүлээн авснаас хойш ажлын 10 хоногийн дотор шийдвэрлэнэ.

Хүсэлтийн хариуг дараах хоёр хэлбэрээр авах боломжтой.

1. www.eec.mn сайтын “Олон улсын үнэлгээ дүйцүүлэх” хэсэгт бүртгэлийн дугаар, нууц үгээрээ нэвтэрч дэлгэрэнгүй хариугаа харах.
2. https://eyesh.eec.mn/ цахим хуудсын “Дүйцүүлэх хүсэлтийн хариу” хэсэгт регистрийн дугаараар нэвтэрч шалгах.

Олон улсын шалгалтын үнэлгээгээ Элсэлтийн шалгалтын үнэлгээтэй дүйцүүлэх шаардлагатай оюутан, суралцагчид хүсэлтээ хугацаанд нь илгээхийг Боловсролын үнэлгээний төвөөс зөвлөв.