Олон хүүхэд төрүүлж өсгөсөн эхийг урамшуулах тухай хуульд өөрчлөлт оруулсан холбоотойгоор өнөөдөр /2026.5.29/ УИХ-ын гишүүн Д.Үүрийнтуяа мэдээлэл хийлээ.
Тэрбээр "УИХ-ын өнөөдрийн чуулганаар ‘Олон хүүхэд төрүүлж, өсгөсөн эхийг урамшуулах тухай’ хуулийн нэмэлт, өөрчлөлтийн төслийг эцэслэн баталлаа. Өмнө нь мөрдөгдөж байсан хуулиар 0-1 хүртэлх насандаа эндсэн хүүхдийг ‘Алдарт эх’-ийн одонгийн хүүхдийн тоонд оруулдаггүй байсан бөгөөд 2024 оны өөрчлөлтөөр зөвхөн 1-ээс дээш насандаа эндсэн хүүхдийг тооцохоор зохицуулсан байв. УИХ-ын гишүүн н.Баярмаа, н.Баасанжаргал, н.Эрдэнэбилэг, н.Уянга, н.Эрдэнэболд нарын зургаан гишүүн санаачлан, ээжүүдийн болон хүүхдийн эрхийг хамгаалах, нөхөн сэргээх зорилгоор энэхүү хуулийн төслийг өргөн барьсан юм.
Хуулийн шинэчлэлтийн гол үзэл санаа нь хүүхэд заавал нэг нас хүрсний дараа одон авдаг байсан зохицуулалтыг өөрчилж, хүүхдээ төрүүлээд нэг сар болсон ээж ч материалаа бүрдүүлж одонгоо авах боломжийг бүрдүүлсэн. Мөн 0-1 насандаа эндсэн хүүхдүүд ч үүнд бүрэн хамрагдахаар боллоо.
Энэхүү хууль батлагдсанаар Олон улсын хүүхдийн эрхийг хамгаалах өдрийн босгон дээр ээжүүд, хүүхдүүдийн эрхийг нөхөн сэргээх чухал алхам боллоо. Хууль хэрэгжиж эхэлснээр урьдчилсан тооцоогоор 27,100 ээж ‘Алдарт эх’-ийн хоёрдугаар одон, 10,154 ээж ‘Алдарт эх’-ийн нэгдүгээр одон авах боломж бүрдэж байна.
Хууль 2027 оны нэгдүгээр сарын 1-нээс хэрэгжиж эхлэх бөгөөд шаардлага хангасан ээжүүд өөрсдөө хүсэлт гаргаж, бичиг баримтаа бүрдүүлснээр ирэх онд одонгоо гардан авах боломжтой болно. Хуулийн шинэчлэлийн гол үзэл санаа нь 0–1 хүртэлх насандаа эндсэн хүүхдүүдийг одонгийн хүүхдийн тоонд хамруулаад зогсохгүй, хүүхэд заавал нэг нас хүрсний дараа одон олгодог байсан зохицуулалтыг өөрчилсөн. Ингэснээр хүүхдээ төрүүлээд нэг сар болсон ээж ч материалаа бүрдүүлж, одон авах боломж бүрдэж байгаа юм" гэлээ.
Сэтгэгдэл бичих