Мансууруулах бодис хэрэглэж, худалдсан 9 иргэнд ял оноожээ

Нийслэлийн прокурорын газраас өнгөрсөн долоо хоногт мансууруулах эм, сэтгэцэд нөлөөт бодис хэрэглэсэн болон худалдан борлуулсан есөн хүнд хорих ял ногдуулжээ.  Тодруулбал, Нийслэлийн прокурорын газраас өнгөрсөн долоо хоногт  есөн хүнд холбогдох гурван хэргийг анхан шатны шүүхээр шийдвэрлүүлж, шүүхээс  найман хүнд 1,6-9 жилийн хугацаатай хорих ял, нэг хүнд зорчих эрхийг хязгаарлах ял оногдуулсан байна. Ял шийтгүүлсэн хүмүүсээс хоёр нь эмэгтэй, гурав нь энэ төрлийн гэмт хэрэгт өмнө нь ял шийтгүүлж байсан байна. Мөн энэ сарын 22-ны өдрийн байдлаар Эрүүгийн хуулийн 20.7 дугаар зүйлд заасан мансууруулах эм, сэтгэцэд нөлөөт бодисыг хууль бусаар ашигласан 143 хүнд холбогдох 98 хэрэгт яллах дүгнэлт үйлдэж, шүүхэд шилжүүлсэн байна.

Шүүхээр шийдвэрлүүлсэн хэргийг тоймлон хүргэж байна.

• Иргэн 43 настай С-нь НҮБ-аас хориглосон сэтгэцэд нөлөөт бодисыг худалдаалах зорилгоор их хэмжээгээр олж авч, бусдад удаа дараа худалдан борлуулж, хадгалдаг байсныг Прокурорын байгууллагаас олж тогтоон сэтгэцэд нөлөөт бодисыг худалдах гэмт хэргийг байнга, тогтвортой үйлдсэн гэм буруутайд тооцож, есөн жилийн хорих ял хорих ял ногдуулсан байна. Мөн гурван иргэнийг сэтгэцэд нөлөөт бодисыг олж, авсан, худалдсан гэмт хэрэг үйлдсэн гэм буруутайд тооцож, 2-6 жилийн хугацаагаар хорих ял тус тус оногдуулж, ялыг нээлттэй хорих байгууллагад эдлүүлэх, А.А-д 2 жилийн зорчих эрхийг хязгаарлах ял ногдуулжээ.
• Иргэн А-нь Хятад улсын иргэнтэй хамтран мөн хориглосон эмийн жагсаалтад багтсан “мөс” гэх хэрэглээний нэршилтэй, сэтгэцэд нөлөөлөх бодисыг өөртөө хэрэглэх зорилгоор олж авсан, хадгалсан хэрэгт Эрүүгийн хуулийн 20.7 дугаар зүйлийн 1 дэх хэсэгт заасан хориглосон сэтгэцэд нөлөөт бодисыг худалдаалах зорилгогүйгээр хууль бусаар олж авсан, хадгалсан гэх үндэслэлээр яллах дүгнэлт үйлдэж, хэргийг шүүхэд шилжүүлсэн. Уг хэрэгт шүүхээс иргэн А болон БНХАУ-ын иргэн Z.X нарыг хориглосон сэтгэцэд нөлөөт бодисыг худалдаалах зорилгогүйгээр хууль бусаар олж авсан, хадгалсан гэмт хэрэг үйлдсэн гэм буруутайд тооцож, Хятад улсын иргэн Х-д 2 жил, 6 сарын хорих ял  иргэн А-д 1 жил, 6 сарын хугацаагаар хорих ял тус тус оногдуулж, ялыг нээлттэй хорих байгууллагад эдлүүлэхээр шийдвэрлэсэн байна.
• Иргэн 49 эрэгтэй С-нь НҮБ-ын 1971 оны Сэтгэцэд нөлөөлөх бодисын тухай конвенцын II жагсаалтад багтсан “өвс” гэх нэршилтэй хориглосон сэтгэцэд нөлөөт бодисыг худалдаалах зорилгогүйгээр хууль бусаар түүж бэлтгэн, улмаар гэртээ хадгалсан хэрэгт Эрүүгийн хуулийн 20.7 дугаар зүйлийн 1 дэх хэсэгт заасан хориглосон сэтгэцэд нөлөөт бодсыг худалдаалах зорилгогүйгээр хууль бусаар олж авсан, хадгалсан гэх үндэслэлээр яллах дүгнэлт үйлдэж, хэргийг шүүхэд шилжүүлсэн байна. Шүүхээс С-ийг хориглосон сэтгэцэд нөлөөт бодисыг худалдаалах зорилгогүйгээр хууль бусаар бэлтгэсэн, хадгалсан гэмт хэргийг үйлдсэн гэм буруутайд тооцож, 1 жил 6 сарын хугацаагаар хорих ял ногдуулж, урьд шийтгэх тогтоолоор ногдуулсан хорих ялаас эдлээгүй үлдсэн ялыг нэмж, нийт 3 жил, 10  сар, 17 хоногийн хугацаагаар хорих ял оногдуулж, ялыг нээлттэй хорих байгууллагад эдлүүлэхээр тус тус шийдвэрлэсэн байна.