Боловсролын сайд Л.Энх-Амгалан өнгөрсөн 4-р сарын 27-ны өдөр боловсролын шинэчлэлийн замын зураглал буюу хэрэгжүүлэх бодлого чиглэлээ танилцуулсан юм. Энэ үеэр сурагчдын Үдийн хоол, цэцэрлэгийн хоолны өнөөгийн байдал болон төсвийг нэмэгдүүлбэл хоолны чанар хэрхэн сайжрах харьцуулалтыг үзүүлсэн юм.
ШУТИС-ийн Үйлдвэрлэлийн технологийн сургуулийн захирал, доктор, дэд профессор Ж.Туяацэцэг сурагчдын үдийн хоол, цэцэрлэгийн хоолыг батлагдсан төсвийн хүрээнд хийсэн болон төсвийг нэмэгдүүлбэл хоолны чанар хэрхэн сайжирч байгааг бодит жишээгээр тайлбарлан танилцуулав.
Тэрбээр, Төрөөс 1-5-р ангийн нэг хүүхдэд өдөрт 2500, долоо хоногт 12500 төгрөгийн төсөв баталсан. 1-5-р ангийн сурагч Үдийн хоолоор хоногийн хоолны илчлэгийнхээ 35 хувь буюу 607Ккал авах ёстой. Одоо Үдийн хоолны төсөв 2500 төгрөг байгаа бол 35 хувьд дүйцэх өөх тос, эрдэс бодисыг авахын тулд 4500 төгрөгийн төсөв шаардлагатай.
Хоолны өртөг өдөр өдөр харилцан адилгүй буюу зарим өдөр 1500, заримд нь 3500 төгрөгийн өртөгтэй хоол орж болно. Харин долоо хоногийн хоолны нийт төсөв 12500 төгрөг болох ёстой.
Сургууль, цэцэрлэгт мөрддөг хоолны жишиг цэс гаргасан байдаг. Цэсийн дагуу энэхүү хоолыг бэлдсэн. Сургууль, цэцэрлэгүүдэд хоол зүйч, мэргэжлийн тогооч ажилладаг. Зарим сургууль хоол зүйчгүй бол тогооч нар батлагдсан жишиг цэсээ баримтлан үдийн хоолыг бэлтгэдэг.
Жишээлбэл,
СУРГУУЛИЙН ҮДИЙН ХООЛОНД
Даваа гарагт.
Одоо- Сүүн шөл, Бүхэл үрийн гурилан булочка- илчлэг 361, өртөг 1548
Сайжруулсан хоол- Алим, хүрэн манжингийн салат, Соустай бөөрөнхий мах, хулууны зутан, амталсан гоймон, самар- илчлэг 607.1, өртөг 4582 төгрөг
Мягмар гарагт.
- Одоо- Будаатай хуурга, өндөг, улаан лоолийн зутан шөл, бор цай- илчлэг 266 буюу 43.6 хувь, өртөг 2500 төгрөг
- Сайжруулсан хоол- Шош ногоотой салат, Жигнэсэн загас, нухсан төмс, жигнэсэн лууван, холимог будаа, Далайн замаг, мөөг дүпүтэй шөл, Лемонтой ус, киви жимс- илчлэг 608.3 буюу , өртөг 4427 төгрөг
Лхагва гарагт.
- Одоо- Тефтель, төмсний нухаш, Байцааны салат, бор цай- илчлэг 284, өртөг 2557 төгрөг
- Сайжруулсан хоол- Амталсан бууцай, Нарийн махан хуурга, агшаасан будаа, тахианы махан ногоотой шөл, хярам, алим- илчлэг 604.1, өртөг 4199 төгрөг
Өгөхийг зорьж байгаа хоол нь олон төрлийн хүнс агуулснаараа онцлог. Хүүхдүүд олон төрлийн хүнснээс шим тэжээлээ авч байх ёстой. Иймд үдийн хоолонд жимс, ногооны бүрдлийг оруулж байна.
Пүрэв гарагт.
- Одоо- Далайн байцаатай ногооны шөл, хуушуур, бор цай- өртөг 3100 төгрөг
- Сам хорхойтой будаатай хуурга, өндөгтэй ногоотой, зутан шөл, жимс
Баасан гарагт.
- Одоо- Цуйван, зөгийн балтай ус- илчлэг 402.6, өртөг 2783 төгрөг
- Сайжруулсан хоол- Шинэ ногооны салат, дотор махан шанзтай жигнэж болгосон пирожки, борцтой будааны зутан, аньсны шүүс, жүрж- илчлэг 613, өртөг 4582 төгрөг
ЦЭЦЭРЛЭГИЙН ХООЛ
Цэцэрлэгийн хүүхдүүд хоногийн илчлэгийнхээ 80 хувийг цэцэрлэгээс авах ёстой.
- Өглөө- Хүүхдийн будааны сүүн шөл
- Бага үд- Үзэмний шүүс
- Өдөр- Борш, цуйван
- Их үд- Аарцтай булочка, бор цай - өртөг 4000 төгрөг
Сайжруулсан хоол
- Өглөө- Хүүхдийн будааны сүүн шөл
- Бага үд- Үзэмний шүүс
- Өдөр- Борш, ногоотой цуйван, байцааны салат, шөл, жүрж
- Их үд- Хөөрүүлсэн сүү, булочка- илчлэг 995, өртөг 7920 төгрөг
Сайд Л.Энх-Амгалан, Төрөөс 1-5-р ангийн сурагчдад үдийн хоол өгч байна. Цаашид хичээвэл 6-9-р ангид үдийн хоол өгөх боломж гарна. Өмнөговь, Орхон зэрэг төсвөө бүрдүүлдэг аймгууд 6-9-р ангийнханд Үдийн хоол өгч эхэлсэн. Үдийн хоолтой болсноор хүүхдийн сурлагын хоцрогдол арилах, хүүхэд сургуульдаа явах сонирхолтой болж байна. КОЙКА-гаас хэрэгжүүлсэн төслийн хүрээнд сургуулийн хоол үйлдвэрлэлийн нэгдсэн лаборитортой боллоо.
-Сурагчдын үдийн хоол, цэцэрлэгийн хоолны төсвийг 50 хувиар нэмэгдүүлэх шаардлага байгааг хоол зүйчид хэлж байна. Төсвийг нэмэгдүүлэх ямар боломж байна вэ?
-Хүүхдийн хоолны төсвийг 2026 онд нэмэгдүүлэх боломж гарахгүй нь. Харин 2027 оны улсын төсвийн төсөл хэлэлцэх үед хүүхдийн хоолны төсвийг нэмэгдүүлэх саналаа тусгахаар ажиллаж байна гэв.
Сэтгэгдэл бичих