АНУ-ын ерөнхийлөгч Дональд Трамп энэ сарын 14, 15-ны өдрүүдэд Бээжинд айлчилж, Хятадын дарга Ши Жиньпинтэй уулзана. Тэд худалдаа, Тайванийн аюулгүй байдал, Ойрхи дорнодын мөргөлдөөн зэрэг өргөн цар хүрээтэй асуудлуудыг хэлэлцэхээр төлөвлөж буй.
Трамп Ази тивийг зорьсон дээрээ Хойд Солонгосын удирдагч Ким Жон Унтай уулзаж магадгүй гэх таамаг аль хэдийнээс үүссэн. Гэвч тэдний уулзалтыг албан ёсоор төлөвлөсөн зүйл одоогоор байхгүйг Цагаан ордон Даваа гаригт /2026.05.04/ мэдэгдлээ. Түүнчлэн хэдий төлөвлөсөн зүйлгүй байгаа ч Трамп нөхцөл болзолгүйгээр Ким Жон Унтай яриа хэлэлцээ хийхэд бэлэн гэжээ.
Ажиглагчдын үзэж буйгаар Трампын Хятад дахь айлчлал өндөр дээд түвшний уулзалт, Иран, АНУ-ын энх тайвны асуудал гээд илүү чухал сэдэвт төвлөрөх учир түүнд Хойд Солонгосын удирдагчтай уулзах зав гаргах боломжгүй байж магадгүй юм.
Трамп, Ким Жон Ун нар гурван удаа биечлэн уулзаж байсан түүхтэй. Эхний уулзалт 2018 оны зургадугаар сард Сингапурт, дараагийнх нь 2019 оны хоёрдугаар сард Ханойд, хамгийн сүүлийнх нь 2019 оны зургадугаар сард Солонгосын хилийн Панмунжомд болж байжээ.
ЭХ СУРВАЛЖ: YONHAP
Сэтгэгдэл бичих